Azərbaycan, Bakı, 20 may/ Trend , müxbir E.Quliyev/ Bu il Şəkidə rayon üçün rekord həcmdə taxıl istehsalı gözlənilir. Bu barədə çərşənbə axşamı Şəkinin Regional Kənd Təsərrüfatı İdarəsinin rəisi Cavanşir Qurbanov məlumat verib.
Onun sözlərinə görə, bu il 150 min ton arpa və buğdanın yığılacağı proqnozlaşdırılır. Ümumilikdə Şəkidə buğda səpini 50,6 min ha ərazidə həyata keçirilib, apra sahəsi 16 min ha tutur.
Agrolizing-in Şəkidəki aqrotexnikiservis filialı tərəfindən məhsulun yığılması üçün 64 taxılyığan kombayn cəlb edilib ki, bu da əhalinin texnikaya olan tələbatının 20-25 faizini təşkil edir. Yığım işləri üçün əlavə texnikanın daxil olacağı gözlənilir.
Azərbaycanın Kənd Təsərrüfatı Nazirliyi 2008-ci ildə ölkədə 2,3 - 2,4 mln. ton taxıl istehsal ediləcəyini proqnozlaşdırır. Azərbaycanın taxıla olan illik tələbatı 3 mln. ton təşkil edir ki, bunun da 1,5 mln. tonu ərzaq taxılının payına düşür.
Şəki Azərbaycanın şimal-qərbində, paytaxtdan 352 km məsafədə yerləşir.