Azərbaycan, Gəncə, 23 may/ Trend , müxbir V.Məmmədov/ Sabahdan etibarən Azərbaycanın qərbində un istehsalı və tədarükü üzrə iri türk şirkətlərindən biri - "Fatoglu" ASC tam gücü ilə işini bərpa edir. ASC ehtiyatlarının azalmasına görə mayın əvvəlində fəaliyyətini dayandırmışdı.
"Fatoglu" ASC əsasən Gəncə, Şəmkir, Ağstafa, Qazax, Tovuz, Goranboy, Yevlax, Daşkəsən, Gədəbəy, həmçinin ölkənin bəzi cənub rayonlarını unla təmin edir. Zavodun aylıq istehsal gücü 8 min ton təşkil edir.
Cümə günü müəssisədən bildiriblər ki, şirkətin fəaliyyətini bərpa etməsinə baxmayaraq, Qazaxıstandan alınan taxılın qiymətinin 30 faiz artması ilə əlaqədar yüksək növlü unun tarifləri arta bilər.
Qiymətlər artarkən, müəssisədə istehsal həcmi azalmayacaq.
"Fatoglu" fəaliyətini dayandırdıqdan sonra, qərb və cənub regionlarında 200-250 qramlıq çörəyin qiyməti 0,20 manatdan 0,30 manatadək, 300-400 qramlıq çörəyin qiyməti isə 0,40 manatadək artıb.
