Azərbaycan, Bakı, 17 iyun / Trend , müxbir S.Ağayeva/ Azərbaycan və Tatarıstan hökumətləri Kazanda iqtisadi əməkdaşlıq perspektivlərini müəyyən edəcəklər. Çərşənbə axşamı Azərbaycanın Baş naziri Artur Rasizadənin Kazana işgüzar səfəri başlayıb.
Tatarıstan nümayəndəliyndən verilən məlumata görə, Nümayəndə heyətinin iki günlük səfər proqramına Azərbaycan və Tatarıstan Respublikalarının ticari-iqtisadi, elmi-texniki və mədəni əməkdaşlıq üzrə Birgə hökumətlərarası komissiyasının II iclasında iştirak, ölkə rəhbəri ilə görüş daxildir.
Azərbaycan hökuməti rəhbərinin Tatarıstan prezidenti Mentimer Şaymiyev, Baş nazir Rustam Minnixanov, Kazan meri İlsur Metşin ilə görüşlərin keçirilməsi planlaşdırılıb.
Tatarıstanın Nazirlər Kabinetində qonaqlar üçün Tatarıstan Respublikası, o cümlədən "Alabuqa", "KAMAZ" ASC, "Tatnefteximinvest-holdinq" ASC və Qorki adına Zelenodolski zavodunun iqtisadi imkanlarının təqdimat mərasimi keçiriləcək, Tatarıstan Respublikası ərazisində reallaşdırılan köhnə evlərin ləğvi və sosial ipoteka proqramları təqdim olunacaq.
Nümayəndə heyəti üzvləri Arsk rayonunun "Ak Bars-aqro" aqrar - sənaye kompleksi, Kazan vertolyot zavodu, yüksək texnoloji tibbi xidmət mütəxəssislərinin hazırlanması üzrə federal tədris-metodika mərkəzində də olması nəzərdə tutulub. Azərbaycanın hökumət üzvlərindən ibarət nümayəndə heyəti Tatarıstanın Xalqlar Dostluğu Evini ziyarət edəcək və burada Azərbaycan diasporunun nümayəndələri ilə görüşəcək.
Məqalə müəllifi ilə əlaqə ünvanı: trend
