Azərbaycan, Bakı, 04 iyul/ Trend , müxbir U.İsmayılova/ Azərbaycan Maliyyə Nazirliyinin ləğv etdiyi Azer-Asia Azərbaycan-İran birgə sığorta şirkətinin təsisçiləri avqustun 4-də növbəti dəfə ləğvetmə komissiyasının yaradılması üçün Bakıda yığışacaqlar, - cümə günü şirkətin idarə heyətinin sədri Qəmbər Suvanverdiyev deib.
Azərbaycan Maliyyə Nazirliyi fevralın 15-də Azer-Asia SŞ-nə 2002-ci il noyabrın 21-də verilən sığorta fəaliyyətinə dair lisenziyanın müddətinin uzadılmasına rədd cavabı verib.
Müddətin uzadılmasına rədd cavabının verilməsinə əsas 2006-ci il oktyabrın 1-dən 2007-ci il oktyabrın 1-dək olan dövrdə Sığorta Qanunvericiliyinə uyğunluq və lisenziya tələbləri üzrə aparılan analizin nəticələri olub. Yoxlama nəticəsində əvvəlcədən Maliyyə Nazirliyi ilə razılaşdırılan sığorta şərtlərinin əməl olunmaması aşkar edilib.
Birgə şirkət təsisçiləri mayda və aperldə iki dəfə məsələnin müzakirəsinə yığışıblar. Lakin İran tərəfi şirkətin ləğv edilməsindən narazı olduğundan, komissiya yaradılmayıb. İranlı təsisçilər son yığıncaqda, 10 milyon dollar sərmayə qoyaraq,şirkətin fəaliyyətinin bərpa edilməsi üçün Maliyyə Nazirliyi ilə danışıqlar aparmaq niyyətində olduqlarını bildiriblər. Azərbaycanlı təsisçilər isə, Dövlət Sığorta Nəzarətinin qərarı ilə razı olduqlarını bildirirlər.
Hazırda şirkət portfelinin satılması və ştat əməkdaşlarının ixtisarı ilə məşğuldur.
Şirkətin təxminən 17 min fiziki şəxs qismində, 60 korporativ müştərisi var. Onların hamısı polislərinin satılması barədə xəbərdar ediliblər.
Şirkət portfelini (bağlanan bütün sığorta polislərini), müqavilə şərtlərini dəyişmədən, yerli sığorta şirkətlərinə satır.
Azer-Asiа birgə sığorta şirkətinin təsisçiləri İranın Asiya Sıgorta (49 faiz) və AzerSıgorta Dövlət Sığorta Kommersiya (51 faiz) şirkətləridir.
Şirkət Azərbaycan sığorta bazarında 1997-ci ildən fəaliyyət göstərirdi.