Azərbaycan, Bakı, 12 iyul/ Trend , müxbir İ.Xəlilova/Azərbaycan-Latviya hökumətlərarası komissiyanın iqtisadi, elmi-texniki və mədəni əməkdaşlıq üzrə ikinci iclası iyulun 15-də Riqada keçiriləcək, - Azərbaycan İqtisadi İnkişaf nazirliyindən bildiriblər.
Həmsədr Heydər Babayevin başçılıq etdiyi Azərbaycan nümayəndə heyəti komissiyanın işində iştirak etmək üçün Riqaya gedir. Latviya tərəfindən komissiyaya iqtisadiyyat naziri Kaspar Gerhards (əvvəllər keçmiş nazir Yuris Strods olub) başçılıq edir.
Komissiyada Azərbaycan və Latviya arasında iqtisadi münasibətlərin cari vəziyyəti və iqtisadiyyatın digər sahələrində əməkdaşlığın inkişaf perspektivləri məsələlərinə baxılacaq. Latviya tərəfi iki ölkənin mərkəzi bankları arasında, xüsusilə də bank nəzarəti istiqamətində, ipoteka krediti sahəsində təcrübə mübadiləsi aparmaq üçün əməkdaşlıq təklif edir. Bundan başqa, yük maşınlarının istehsalı üzrə bu il Latviyada tikilmiş zavodla Gəncə avtomobil zavodu arasında əməkdaşlıq perspektivlərinin müzakirəsinə də maraq var.
Azərbaycanın iqtisadi inkişaf naziri səfər çərçivəsində Latviya dövlət strukturlarının bir sıra rəhbər şəxsləri ilə görüşlər keçirməyi də planlaşdırır.
Azərbaycan və Latviya arasında normativ-hüquqi baza, orta hesabla, 10 razılaşmadan ibarətdir. İqtisadiyyat sahəsində qarşılıqlı sərmayələrin müdafiəsi, ikili vergiqoymadan yayınma, iqtisadi və elmi-texniki əməkdaşlıq üzrə razılaşmalar artıq imzalanıb.
Mövcud hüquqi baza əsasında iki ölkə arasında mal dövriyyəsi çox aşağıdır və demək olar ki, sərmayələr yox dərəcəsindədir. 2005-ci ildə Azərbaycan və Latviya arasında mal dövriyyəsinin həcmi 2004-cü ilə nisbətən 52 faiz azalaraq, $7 milyon təşkil edib. İki biznes-forum keçirildikdən sonra 2006-cı ilin nəticələri üzrə vəziyyət bir qədər yaxşılaşıb.Mal dövriyyəsinin həcmi, orta hesabla, 32 faiz artıb və $10,2 milyona çatıb. Bununla belə, ixrac əməliyyatlarının payına $8 milyon düşüb.
2007-ci ildə mal dövriyyəsinin həcmi $5,326, 2008-ci ilin ilk rübündə $1,519 milyon təşkil edib.
İxrac malı nomenklaturasında spirtli içkilər, neft və kimya məhsulları, pambıq üstünlük təşkil edib. Latviyadan Azərbaycana, əsasən, süd məhsulları, radio-kommunikasiya və kənd təsərrüfatı avadanlıqları idxal edilir.
