Azərbaycan, Bakı, 14 iyul/ Trend , müxbir Ü.İsmayılova/ 1995-ci ildə əsası qoyulan İSR Holding Azərbaycanın "Kavkaz Sigorta" sığorta şirkətini alır. "Biz artıq "Kavkaz Sigorta" sığorta şirkətinin alınması prosesinə başlamışıq", - holdinqin prezidenti İsgəndər Xəlilov bazar ertəsi Trend -a bildirib.
Azərbaycanın "Ateshgah" sığorta şirkətinin səhmlərinin 49 faizinə malik İSR Holding "Kavkaz Sigorta"dan əlavə adının açıqlanmadığı üçüncü yerli sığorta şirkətini almağı planlaşdırır.
"İSR Holding-in alacağı üçüncü sığorta şirkətinin adı iyulun sonunda, danışıqlar başa çatdıqdan sonra açıqlanacaq", - Xəlilov bildirib.
İSR Holding-in fəaliyyətinin əsas istiqamətləri biznes-mərkəzlərin, mehmanxanaların və yaşayış komplekslərinin tikintisi, yod hasilatı və istehsalı və s.ilə bağlıdır.
Fevralda Azərbaycanın iri sığorta şirkətlərindən biri - "Ateshgah"ın səhmdarlarının ümumi toplantısında təsisçilərin tərkibinin dəyişdirilməsi barədə qərar qəbul edilib. Şirkətin səhmdarı "Kapital" Sığorta Qrupuna daxil olan "Norcross" şirkətindən səhmlərin 49 faizini almış İSR Holding olub.
"Kavkaz Sigorta" ASC Azərbaycanın sığorta bazarında 1998-ci ildən fəaliyyət göstərir. Şirkətin Nizamnamə kapitalı 1 mln. manat təşkil edir.
Müəlliflə əlaqə saxlamaq üçün elektron ünvan: [email protected]