...

Azərbaycanın özəl bank sektorunun tarixində ən iri kredit müqaviləsi imzalanıb

Biznes və iqtisadiyyat xəbərləri Materials 18 İyul 2008 19:26 (UTC +04:00)

Azərbaycan, Bakı, 18 iyul/ Trend , müxbir İ.Xəlilova/ Azərbaycanın Bank Respublika bankı və Avstriyanın Raiffeisen Zentralbank Oesterreich AG ("RZB") bankı $50 mln. məbləğində Azərbaycan özəl bank sektorunun tarixində ən iri kredit müqaviləsi imzalayıblar. Bu barədə cümə günü Bankdan məlumat veriblər.

Bundan əlavə, imzalanmış müqavilə Azərbaycanda CLN (Credit Linked Notes) tipli birinci müqavilədir. Müqavilə çərçivəsində RZB -nin kredit ehtiyatlarına notlar buraxılıb və müxtəlif sərmayədarlara satılıb.

Bank Respublika bu uğurlu əməliyyatla ilk dəfə olaraq bazarda mövqeyinin möhkəmlənməsi və artım strategiyasının dəstəklənməsi məqsədilə əlavə vəsaitlərin cəlb edilməsi üçün kapital bazarlarından istifadə etməyə başlayıb. Bu, həmçinin, banka tərəfdaş banklarda kredit xətləri bağlanılmadan, bütün Avropadan sərmayədarların vəsaitlərini cəlb edərək, ehtiyat bazasını genişləndirməyə imkan verir. Müqavilə üç il müddətinə bağlanılıb və ayrılmış vəsaitlər Bank Respublika-nın müştərilərinə kreditlərin verilməsinə yönələcək.

Vyana, Frankfurt, Riqa və Londonda keçirilən təqdimatlar seriyasından sonra (road show) tranzaksiya iyunun 25-də buraxılıb və iyulun 2-də başa çatdırılıb.

"Bank Respublika-nın mötəbər maliyyə göstəriciləri və peşəkar menecment sərmayədarlar tərəfindən yüksək səviyyədə qiymətləndirilib və bu, kapital bazarlarında uğurlu debütə səbəb olub", - bankdan qeyd ediblər.

Sərmayədarların ölkələr üzrə coğrafi baxımdan paylanması aşağıdakı kimidir: Böyük Britaniya - 52 faiz, Avstriya - 18 faiz, Baltika ölkələri - 13 faiz, Rusiya - 5 faiz, digər ölkələr - 12 faiz. Sərmayədarlar arasında fondlar - 40 faiz, banklar - 30 faiz, aktivlərin idarə edilməsi üzrə şirkətlər - 30 faiz təşkil edib.

Bank Respublika ticarət maliyyələşdirməsi proqramı üzrə RZB ilə də əməkdaşlıq edir.

Bank Respublika və beynəlxalq maliyyə təşkilatları arasında müxtəlif kredit proqramları və ticarətin maliyyələşdirilməsinə görə imzalanan razılaşmaların ümumi həcmi 200 mln. ABŞ dollarını keçib. Bank Respublika Avropa Yenidənqurma və İnkişaf Bankı, Asiya İnkişaf Bankı, Beynəlxalq Maliyyə Korporasiyası, Standart Bank Plc. (London), Hollandiya İnkişaf Maliyyə Şirkəti FMO, Alman-Azərbaycan Fondu, Qara Dəniz Ticarət və İnkişaf Bankı, DEG Almaniya İnvestisiya Şirkəti, RZB, Sumitomo Mitsui Bank Korporasiyası, Commerzbank AG, Dresdner Bank və digər maliyyə təşkilatları ilə əməkdaşlıq edir.

Bank Respublika 1992 - ci ildən fəaliyyət göstərir və Azərbaycanın aparıcı banklarından biridir. Bankın səhmdarları sırasında 25% + 1 səhm payla Almaniyanın 2 böyük maliyyə təşkilatları da var- KfW bank qrupunun üzvü DEG və Sparkassen-Finanzgruppe üzvü SIDT.

Bank Respublika Moody's Investors Service tərəfindən milli və xarici valyutada olan depozitlər üzrə B2 dərəcəli "pozitiv" proqnozlu uzunmüddətli reytinqə malikdir.

Bank Respublika-nın hazırda aktivləri 370,2 mln. AZN, kredit portfeli - 232,5 mln. AZN, depozit portfeli - 141,8 mln. AZN təşkil edir. Bakıda və regionlarda Bankın 28 filial və şöbəsi fəaliyyət göstərir.

İyulun 18 -nə olan cari məzənnə -- 0,8058 AZN/USD.

Müəlliflə əlaqə saxlamaq üçün elektron ünvan: [email protected]

Xəbər lenti

Xəbər lenti