Azərbaycan, Bakı, 07 avqust/ Trend müxbir İ.Xəlilova/ Ölkə prezidenti Bakıda müasir standartlar üzrə mərkəzləşdirilmiş bərk məişət tullantılarının yığılması, emalı və utilizasiyası sisteminin yaradılması məqsədilə "Təmiz şəhər" Açıq tipli Səhmdar Cəmiyyətinin təsis edilməsi haqqında sərəncam verib.
Onun vəzifələrinə bərk məişət tullantılarının yerləşdirilməsi və zərərsizləşdirilməsi daxildir. Bakının İcra Hakimiyyətinə, yığıldıqdan və daşındıqdan sonra bütün bərk tullantılarını, yaranma mənbəyindən asılı olmayaraq, ASC-yə vermək tapşırılıb.
"Təmiz şəhər"in təşkili üçün Bakı İH Mənzil-Kommunal Təsərrüfatı Departamentinin balansında olan Balaxanı məişət tullantıları poliqonu və Suraxanı və Qaradağ rayonları ərazisində bərk tullantıların yerləşdirilməsi və zərərsizləşdirilməsi üçün nəzərdə tutulmuş əmlak ona verilib. Bərk tullantıların yığılması və daşınması üzrə dövlət idarə və təşkilatlarının funksiyaları, zibil yığılması üzrə məntəqələr, onların balansında olan maşın və mexanizmlər Bakı İcra Hakimiyyətinə verilir.
"Təmiz şəhər"in səhmlərinin əsas hissəsi Dövlət Əmlakının İdarə edilməsi üzrə Dövlət Komitəsinə məxsusdur. İqtisadi İnkişaf Nazirliyinə Nizamnamənin hazırlanması və ASC- nin qeydiyyatı üzrə tədbirlərin həyata keçirilməsi, ASC-nin sədri, İdarə Heyəti və Müşahidə Şurası üzvlərinin təyin edilməsi, onun səhmlərinin səmərəli idarə edilməsi tapşırılıb. İİN hər il onun illik hesabatlarını və gəlirin (ziyanın) paylanılması üzrə hesabatları da təsdiqləyəcək.
Nazirlər Kabinetinə normativ-hüquqi bazanı "Bakı şəhərində məişət tullantılarının idarə edilməsi haqqında" sərəncama müvafiq vəziyyətə gətirmək, həmçinin üç ay ərzində baza iqtisadiyyatı prinsipləri üzrə bərk məişət tullantılarının yığılması, saxlanılması və təkrar emalının təşkilinə dair təkliflərin hazırlanması haqqında tapşırıqlar verilib. Bakı İcra Hakimiyyətinə ASC- nin formalaşdırılmasınadək şəhərdə zibilin yığılması üzrə fasiləsiz işi təmin etmək tövsiyə edilib.
Rəsmi məlumatlara əsasən, Bakı və onun ətrafında hər il 1 mln. ton məişət tullantısı toplanır. Bakı ətrafında üç məişət tullantısı poliqonu var. Zibilin yandırılması üzrə yeni zavod ildə 600 min tondan az olmayan həcmdə zibil emal etməlidir və bu, bir-iki zavodun yaradılmasını nəzərdə tutur.
Müəlliflə əlaqə saxlamaq üçün elektron ünvan: [email protected]
