Azərbaycan, Bakı, 10 sentyabr / Trend , müxbir İ.Xəlilova/ "Avropa Yenidənqurma və İnkişaf Bankı (AYİB) Azərbaycanda 77 layihəyə $700 mln. vəsait yatırıb", - çərşənbə günü Bakıda keçirilən "Azərbaycan və Türkmənistanın neft və qaz potensialı: energetika, iqtisadiyyat, ekologiya. Əməkdaşlıq Strategiyası" beynəlxalq konfransında çıxış edən AYİB-in nümayəndəsi Olvin Buldxo bildirib.
Onun sözlərinə görə, bu layihələrin ümumi dəyəri $2,6 mlrd.-a bərabərdir. Əlavə cəlb edilən vəsaitlər hesabına layihələrə $1,9 mlrd. sərmayə yatırılıb.
Azərbaycanın özəl sektoruna yatırılan vəsaitlərdə AYİB-in xüsusi çəkisi 53 faizdir.
Avropa Bankı Azərbaycanın neft-qaz sektoruna sərmayələri korporativ sektorda islahatların dəstəklənməsi, artımın və kiçik və orta sahibkarlığın inkişafının təmin edilməsinə, enerji infrastrukturunun bərpası və kommersiyalaşdırılmasına yönəlir. AYİB ətraf mühitin mühafizəsi və enerji baxımından səmərəli layihələrin realizəsinə böyük diqqət ayırır.
2008-ci il ərzində AYİB dəyəri 25 mln. avro olan və maliyyə, kommunikasiya, turizm və s. sahələrini əhatə edən 10 layihəni təsdiqləyib.
AYİB 2008-ci ildə Azərbaycanda ümumi dəyəri 148-180 mln. avro olmaqla 18 layihənin maliyyələşdirilməsi imkanını nəzərdən keçirir. Onlardan səkkizi kiçik layihələrdir və sahibkarların maliyyələşdirilməsinə yönəlib. Lakin iki-üç layihə sahibkarlıq fəaliyyətinin inkişafı ilə bağlıdır. Bank sektorunun gücləndirilməsi üçün 60 mln. avro ayrımaq planlaşdırılır. Bu vəsait, orta və kiçik biznesin dəstəklənməsi, ipoteka kreditləşməsi və mikormaliyyələşdirmə üçün nəzərdə tutulub.
Azərbaycan 1992-ci ildən Avropa Yenidənqurma və İnkişaf Bankının üzvüdür. AYİB bütün əməkdaşlıq dövründə Azərbaycandakı təxminən bütün infrastruktur layihələrində iştirak edib. 2007-ci ildə bank 1,1 mlrd. avro gəlir əldə edib.
Ötən il Azərbaycandakı layihələrin maliyyələşdirilməsinə $182 mln., 2006-cı ildə isə $120 mln. vəsait ayrılıb.
Avropa Yenidənqurma və İnkişaf Bankının tarixində ilk dəfə olaraq, AYİB-in həyata keçirdiyi layihələrə dəstək məqsədilə texniki yardımın maliyyələşdirilməsini nəzərdə tutuan yeni fonda 115 mln. avro ayırımaq haqqında qərar qəbul edilib.
Azərbaycanda fəaliyyətə başladığı vaxtdan Avropa Bankının Azərbaycanın layihələrində maliyyələşdirmə portfeli $1 mlrd. təşkil edir. Birgə maliyyələşdirilmiş layihələr nəzərə alınmaqla portfel $4 mlrd.-dək çatır.
Sentyabrın 10-na olan cari məzənnə -- 0,8155 AZN/USD
Müəlliflə əlaqə saxlamaq üçün elektron ünvan [email protected]