Azərbaycan, Bakı, 15 sentyabr/ Trend , müxbir İ.Xəlilova/ Beynəlxalq Maliyyə Korporasiyası (BMK) Azərbaycan üçün "Qiymətləndirmə fəaliyyəti haqqında" Qanunun yeni redaktəsini hazırlayıb. Yeni redaktə yeni özünütənzimləmə, peşəkar qiymətləndiricilər təşkilatı tərəfindən qiymətləndiricinin keyfiyyətinə nəzarət prinsiplərinə əsaslanır. O, işçi qrupunun bazar ertəsi keçirilən iclasında BMK- nın məsləhətçisi, Rusiya Qiymətləndiricilər Cəmiyyətinin (RQC) birinci vitse-prezidenti İqor Artemenkov tərəfindən təqdim edilib.
Qanunda qiymətləndiricilərin bu təşkilatda məcburi üzvlüyünün tətbiqi təklif olunur ki, bu da onların bazara çıxışını təmin edəcək. Qanunda qiymətləndiricinin məsuliyyətinin icbari sığortası da nəzərdə tutulur. Artemenkov bununla da peşəkar təşkilatın statusunun artacağını bildirib və Azərbaycanın Qiymətləndiricilər Cəmiyyətinə onun funksiyalarının icrasını təklif edib.
Bir il əvvəl Rusiyanın qiymətləndirmə fəaliyyəti üzrə qanunvericiliyində analoji mexanizm tətbiq edilib və bu gün bu sistem kifayət qədər səmərəli qurulub. Bütün bu mexanizmlər inkişaf etmiş bazarlarda qüvvədədir. Məsləhətçi hesab edir ki, qiymətləndiricilər özünütənzimləyən təşkilatlardan birinin üzvü olmağa məcburdurlar. Başlanğıc mərhələdə Azərbaycanda üzvlərin sayı 100 -200 nəfər ola bilər. Rusiyada belə strukturun 300 üzvü var.
Bu gün 30 fiziki və 7 hüquqi şəxs Azərbaycanın Qiymətləndiricilər Cəmiyyətinin üzvləridir. "Bu xidmət keyfiyyəti mexanizmi, ölkə iqtisadiyyatına yatırılan böyük sərmayələr, ipoteka kreditləşməsinin inkişafı nəzərə alınmaqla, bu gün kifayət qədər fəal inkişaf edən Azərbaycanda da xidmətlərin keyfiyyətini əhəmiyyətli dərəcədə artıracaq", - məsləhətçi bildirib.
Onun rəyinə görə, tələbat baxımından bazar keyfiyyətli, peşəkar qiymətləndirmədə maraqlıdır. Əsas problemlər arasında o, qiymətləndiriciyə minimal tələbin yoxluğunu göstərib. Belə ki, 1998 - ci ildən qüvvədə olan Qanun ixtisassız mütəxəssislərin aşağı keyfiyyətli, dempinq qiymətləri üzrə xidmətlər göstərməklə qiymətləndirmə fəaliyyəti ilə məşğul olmasına mane olmur və bununla da bazarı dağıdır.
AMB nəzdində Azərbaycan İpoteka Fondu bu boşluqları aradan qaldırmaq üçün təkliflər paketinin, o cümlədən qiymətləndirmə fəaliyyəti haqqında qanunvericiliyin, qiymətləndiriclərin sertifikatlaşdırılması sisteminin, qiymətləndirmə standartları, fonda yardım etmək və gələcəkdə mümkün itkilərdən qaçmaq üçün qiymətləndirmə bazarında tətbiqi nəzərdə tutulan kompleks tədbirlər paketinin hazırlanması üçün mütəxəssis dəvət edib. Qiymətləndirmə sisteminin olması ipoteka kreditləşməsi zamanı yarana biləcək problemlərdən qaçmağa imkan verəcək.
Rusiya Qiymətləndiricilər Cəmiyyəti qiymətləndirmə sahəsində kadrların hazırlanması sisteminin təşkilinə texniki yardımın, qiymətləndirmə fəaliyyyətinin inkişafında işçi qrupuna məsləhət xidmətlərinin göstərilməsinə hazır olduğunu bildirib.
Bütün maraqlı tərəflərin cəlb edilməsi ilə işçi qrupunun yaradılması təşəbbüsü mayın 26 - da Bakıda keçirilən, daşınmaz əmlakın müstəqil qiymətləndirilməsi institutunun inkişafı sahəsində beynəlxalq təcrübənin öyrənilməsi və Azərbaycanda bu sistemin perspektivlərinə həsr olunmuş konfransda açıqlanıb.
BMK Azərbaycanda ilkin mənzil bazarının maliyyələşdirilməsi üzrə əvvəllər apardığı araşdırmalarda qiymətləndirmə fəaliyyətinin lisenziyalaşdırılmasının (ölkədə 2002 - ci ildə ləğv edilib) olmaması problemini qeyd edib. Artemenkov hesab edir ki, nəzarətin yoxluğu bank fəaliyyətində böhranlara gətirə bilər.
Qiymətləndirmə fəaliyyətinin inkişafı üzrə tədbir BMK-nın texniki yardım layihəsinin II fazası çərçivəsində keçirilir. Layihə Maliyyə Korporasiyası və İsveçrənin İqtisadi Əlaqələr üzrə Dövlət Katibliyi (State Secretariat for Economic Affairs - SECO) tərəfindən birgə maliyyələşdirilir. Regional xarakterli layihə Mərkəzi Asiya və Azərbaycanı əhatə etsə də, SECO -nun vəsaitləri yalnız Azərbaycan üçün nəzərdə tutulub.
Müəlliflə əlaqə saxlamaq üçün elektron ünvan - [email protected]
