Azərbaycan, Bakı, 18 sentyabr/ Trend , müxbir E.İsmayılov/ "Aqrar-kredit" bank olmayan kredit təşkilatının kənd təsərrüfatı bankına çevrilməsindən sonra, bankın kapitalının 50 faizini əcnəbi sərmayədarlara vermək planlaşdırılır, "Aqrar-kredit"in İdarə Heyətinin sədri Məmməd Musayev cümə axşamı bildirib.
"Hazırda biz 20 Avropa bankından ibarət siyahı formalaşdırmışıq. Bu banklarla aqrar bankın səhmdarlığına daxil olmaqla bağlı danışıqlar aparılacaq, - Musayev bildirib. - Bizi qane edərsə, onlarla danışıqları davam etdirəcəyik".
Qalan səhm paketi (50 faiz) 25/25 prinsipi üzrə yerli özəl sektor və dövlət arasında bölünəcək. "Aqrar-kredit" rəhbərinin sözlərinə görə, perspektivdə dövlətin bankdakı payı da özəlləşdiriləcək.
Azərbaycan Milli Bankı (AMB) İdarə Heyətinin sədri Elman Rüstəmovun bir müddət əvvəl bildirdiyinə görə, Avropa Yenidənqurma və İnkişaf Bankı (AYİB) "Aqrar-kredit"in bazasında yaradılan kənd təsərrüfatı bankında 25+1 faiz səhm paketinin alınmasına razı olduğunu artıq təsdiqləyib. Lakin, AYİB-in Direktorlar Şurası səviyyəsində qərar aqrar bankın yaradılmasından sonra qəbul ediləcək. Bankın yaradılması isə ölkə hökumətindən asılıdır.
Beynəlxalq Maliyyə Korporasiyası (BMK) və Alman İnkişaf Bankı KfW də kənd təsərrüfatı bankının yaradılmasında iştiraka maraq göstərir. Bu maliyyə institutları ilə məsləhətləşmələr davam etdirilir və onlaraın hər birinə 10-15 faiz səhm təklif edilə bilər.
Kredit təşkilatı hazırda məhdud lisenziya əsasında fəaliyyət göstərir. Digər dövlət bankları - Azərbaycan Beynəlxalq Bankı və Kapital Bank ilə (iyunda onun özəlləşdirilməsi başa çatıb) olduğu kimi, hökumət "Aqrar-kredit"in dövlətsizləşdirilməsinə başlayanadək, onun kapitallaşdırılmasını davam etdirəcək. Kredit təşkilatının kapitalının artırılması üçün 2008 - ci ilin dövlət büdcəsində 1 mln. manat vəsait nəzərdə tutulub. "Aqrar-kredit" cari ilin yekunları üzrə bu vəsaiti dividendlər qismində dövlət xəzinəsinə qaytarmağı planlaşdırır.
Dövlətin 2007-ci ilin dövlət büdcəsi vəsaitləri hesabına 6,3 mln. manat ödəməsindən sonra hazırda kredit təşkilatının kapital 18,6 mln. manat səviyyəsində formalaşıb. "Aqrar-kredit"in aktivləri 25 mln. manat, kredit portfeli isə, 15 mln. manat təşkil edir və ilin sonunadək onu 17 mln. manata çatdırmaq planlaşdırılır. Kredit təşkilatının vəsaitlərin cəlb edilməsi ilə bağlı imkanları məhdud olduğunndan, onun göstəriciləri cüzi artıb, - "Aqrar-kredit"də hesab edirlər.
Ölkə hökuməti $1,2-1,3 mlrd. maliyyə vəsaitinə ehtiyacı olan aqrar sektorun inkişafında maraqlıdır və buna görə tezliklə kənd təsərrüfatı bankının yaradılmasının qaçılmaz olduğunu başa düşür.
"Aqrar-kredit"in əsas səhmdarı kredit təşkilatının 99,9 faiz səhmlərinə malik olan Azərbaycan Maliyyə Nazirliyidir. Qalan səhmlər "Azərsığorta" dövlət sığorta şirkəti və "Meliorasiya və Su Təsərrüfatı" ASC arasında bərabər paylanıb.
Sentyabrın 18-nə olan cari mübadilə məzənnəsi -- 0,8126 AZN/USD
Müəlliflə əlaqə saxlamaq üçün elektron ünvan: [email protected]
