Azərbaycan, Bakı, 26 sentyabr/ Trend , müxbir S.Babayeva/ Cümə günü Bakıda Səhiyyə Nazirliyi, SOCAR şirkətinin (Azərbaycanın Dövlət Neft Şirkəti) Mərkəzi Neftçilər Xəstəxanası, Azərbaycanın Kardiovaskulyar Cərrahlar Assosiasiyası və Azərbaycan -Türkiyə Endoskopik Cərrahlar Assosiasiyasının təşkil etdiyi orqan və toxumaların transplantasiyası üzrə simpozium işə başlayıb. Bu, Azərbaycanda keçirilən ilk belə simpoziumdur.
"Biz ümid edirik ki, yaxın gələcəkdə Azərbaycanda yalnız böyrəklərin deyil, digər orqanların transplantasiyası üzrə çətin əməliyyatlar keçiriləcək", - Mərkəzi Neftçilər Xəstəxanasının baş həkimi Fəxrəddin Cavadov bildirib. O qeyd edib ki, 10 gün əvvəl tibb müəssisəsində ilk dəfə böyrəklərin köçürülməsi üzrə uğurlu əməliyyat həyata keçirilib.
Simpoziumun açılışında M.Topçubaşov adına Elmi-Cərrahi Mərkəzin rəhbəri Böyükkişi Ağayev, Azərbaycanın Kardiovaskulyar Cərrahlar Assosiasiyasının sədri Rəşad Mahmudov, Türkiyənin orqanların transplantasiyası üzrə koordinatorlarının sədri Ata Bozuklar və digər şəxslər iştirak edib.
Sentyabrın 27- dək davam edəcək konfransda ürək çatışmazlığının cərrahi müalicəsi, ürəyin, qara ciyərin, ağ ciyərlərin transplantasiyası, abdominal orqan transplantasiyası və s. məsələlər müzakirə ediləcək.
Bu gün Azərbaycanda yalnız böyrəklərin transplantasiyası həyata keçirilir. İlk belə əməliyyat ötən əsrin 70 - ci illərində aparılıb.
