Azərbaycan, Bakı, 26 sentyabr/ Trend , müxbir İ.Xəlilova/ "Avropa Komissiyası 22 mln. avro dəyərində 2008 - ci il üçün Avropa Qonşuluq Siyasəti (ENP) indikativ Proqramının ilkin varinatını Azərbaycan hökumətinə təqdim edib,- Avropa İttifaqının Texniki Yardım Proqramları (Tacis) Koordinasiya Bürosunun icraçı direktoru Rüfət Məmmədov cümə günü bildirib.
"Avropa Komissiyasının təklifi ölkənin Nazirlər Kabinetinin ekspertizasındadır", - Məmmədov qeyd edib.
Proqram çərçivəsində, Azərbaycanın dövlət büdcəsi vasitəsilə ədliyyə sahəsində islahatlar dəstəklənəcək. Proqrama əsasən, tvininiq-proqram üzrə 6 mln. avro, ədliyyə sahəsində büdcənin dəstəklənməsi üçün 16 mln. avro nəzərdə tutulub.
Tvininq-proqram üzrə ətraf mühitin mühafizəsi sahəsində, insan hüquqlarının müdafiəsi istiqamətində yardımın göstərilməsi, idarəetmənin gücləndirilməsi, yoxsulluğun azaldılması gözlənilir. Yardımın alıcıları kimi İqtisadi İnkişaf, Ekologiya və Təbii Sərvətlər nazirlikləri, Korrupsiya ilə mübarizə üzrə Dövlət Komissiyası çıxış edə bilər.
2007 - 2010 - cu illərdə Azərbaycan üçün ENP büdcəsi 92 mln. avro həcmində nəzərdə tutulub. Bu günə 2007 - ci ilin büdcəsi çərçivəsində 19 mln. məbləğində yardımın istiqamətləri müəyyən edilib. 2009-cu il üçün büdcə hələ müəyyən edilməsədə, yardım aqrar sektor istiqamətində göstəriləcək.
2006 - cı ilin noyabrında Brüsseldə təsdiq edilmiş Azərbaycan üçün ENP fəaliyyət planında ölkədə demokratiyanın gücləndirilməsi; işgüzar və sərmayə mühitinin yaxşılaşdırılması; davamlı iqtisadi inkişafın təmin edilməsi; idarəetmə təcrübəsinin iqtisadi sahədə qanunvericiliklə uyğun vəziyyətə gətirilməsi; Avropa İttifaqı və Azərbaycan arasında enerji və nəqliyyat sahələrində əməkdaşlığın, regional əməkdaşlığın, sərhədyanı idarəetmə sahəsində əməkdaşlığın gücləndirilməsi s. priroritet istiqamətlər kimi müəyyən edilib.
Müəlliflə əlaqə saxlamaq üçün elektron ünvan: [email protected]
