Azərbaycan, Bakı, 27 sentyabr/ Trend , müxbir İ.Xəlilova/ Finlandiyanın xarici ticarət naziri Paavo Vayrinenin (Paavo Vayrynen) Azərbaycana səfəri çərçivəsində, oktyabrın 8 - də Azərbaycan - Finlandiya biznes - forumu keçiriləcək. Bu barədə şənbə günü Azərbaycanın İxrac və İnvestisiyaların Təşviqi Fondundan (AZPROMO) bildiriblər.
Finlandiyanın nümayəndə heyəti geniş tərkibdə təmsil olunacaq; səfər zamanı gələcək əməkdaşlıq perspektivləri müzakirə olunacaq. Bu gün iki ölkə arasında iqtisadi münasibətlər lazımi səviyyədə deyil, bunu Azərbaycan prezidenti İlham Əliyev 2008 - ci ilin mayında Finlandiyaya ilk səfəri zamanı da qeyd edib.
"Biz ölkələrimiz arasındakı iqtisadi münasibətləri siyasi sahədə olduğu kimi uğurla inkişaf etdirməyə çalışırıq", - deyə dövlət rəhbəri Finlandiya prezidenti Tarya Halonen ilə görüşdə bildirib.
Prezident Əliyev Azərbaycanın xarici ölkələrin iqtisadiyyatına sərmayə yatırmağa hazır olduğunu da bildirib. Bu gün respublika tərəfindən artıq 2,5 mlrd. dollar sərmayə yatırılıb.
AZPROMO - dan bildiriblər ki, Azərbaycan və Finlandiya biznesmenləri arasında ilk görüş dörd il əvvəl - Finlandiya prezidentinin Bakıya səfəri zamanı keçirilib.
"İlk biznes - forumdan sonra iki ölkənin iş adamları arasında əlaqələrin qurulmasının müəyyən nəticələri olub, lakin bu dəfəki görüşdən biz çox şey gözləyirik", - deyə Fonddan bildiriblər. Finlandiyanın biznes adamlarından ibarət nümayəndə heyətinin tərkibi hazırda dəqiqləşdirilir.
Azərbaycan Dövlət Statistika Komitəsinin məlumatına görə, yanvar - iyul ərzində ölkələr arasında ticari münasibətlər 119,1 mln.dollar (idxal - $118,9 mln., ixrac - $0,22 mln.) həcmində olub.
Məqalə müəllifi ilə əlaqə ünvanı - [email protected]