Azərbaycan, Bakı, 10 oktyabr/ Trend müxbir İ.Xəlilova/ Gürcüstan sərhədinədək avtomagistralın bir hissəsi olan Gəncə dairəvi yolunun yenidən qurulması layihəsi üzrə kredit sazişinin AİB - in prezidenti Haruhiko Kurodanın (Haruhiko Kuroda) Azərbaycana səfəri zamanı imzalanacağı gözlənilir, - Bankın Bakı nümayəndəliyindən cümə günü bildiriblər. Onun səfəri noyabrın 20 - də baş tutacaq. Kuroda Mərkəzi Asiya İqtisadi Əməkdaşlıq (CAREC) proqramı üzrə nazirlər konfransında iştirak etmək üçün Azərbaycana gələcək.
Bank bu layihənin realizəsinə $55,4 mln. vəsait ayırıb. Layihənin ümumi dəyəri isə $73,9 mln. təşkil edir. Qalan $18,5 mln. Azərbaycan hökumətinin payına düşür.
Hazırda bu kredit sazişinin imzalanması üçün dövlətdaxili prosedurlar aparılır.
Yolun uzunluğu 39 kilometrdir. Yolun bu sahəsi Şərq - Qərb avtomagistralının Yevlax -Gəncə və Qaza - Gürcüstan sərhədi sahələrinin yenidənqurma layihəsinə daxildir. Bu layihənin maliyyələşdirilməsində də AİB - in vəsaitlərindən istifadə edilir. Lakin layihənin bahalaşması ilə əlaqədar əlavə maliyyə tələb olunub. O, Azərbaycanda yol layihələri üçün 2007- ci ilin sentyabrında $500 mln. dəyərində təsdiq edilmiş multitranş paketdən qalan vəsaitlərdən təqdim edilib.
Uzunluğu 88,8 km olan birinci sahə -- Yevlax - Gəncə sahəsinin ümumi dəyəri $58,7 mln. təşkil edir. Onlardan $10,4 mln. İslam İnkişaf Bankının, $11 mln. Səudiyyə İnkişaf Fondunun, $24 mln. AİB və $13,3 mln. isə Azərbaycan hökumətinin payına düşür. Uzunluğu 38,8 km olan ikinci sahə Qazax - Gürcüstan sərhədi $30 mln. məbləğində qiymətləndirilir. O, AİB- in $28 mln. həcmində krediti və Azərbaycan payı ($2 mln.) hesabına maliyyəlşdiriləcək.
Hazırda multitranş paketdən Masallı - Astara yolunun yenidən qurulması üçün $200 mln. vəsaitin ayrılması təqdir edilib. MFF paketinin 2014 - cü ilədək mənimsənilməsi nəzərdə tutulur.
Müəlliflə əlaqə ünvanı :- [email protected]
