Azərbaycan, Bakı, 14 oktyabr/ Trend , müxbir Ü.İsmayılova/"Azərbaycan Sığortaçılar Assosiasiyası (ASA) Müşahidə Şurasının gələn həftə keçiriləcək iclasında 2008 - 2009 - cu illər üçün Inkişaf Planını müzakirə edəcək", - çərşənbə axşamı Assosiasiyanın İdarə Heyətinin sədri, MBASK sığorta şirkətinin rəhbəri Cəmil Məlikov deyib.
"Planın reallaşdırılmasında əsas məqsəd Assosiasiyanın fəaliyyəti üzrə təbliğat işlərinin aparılmasıdır", - Məlikov bildirib.
Onun sözlərinə görə, təbliğat işləri KİV vasitəsilə aparılacaq.
"Assosiasiyanın inkişaf planına Assosiasiya nümayəndələrinin sığorta şirkətləri ilə problem məsələlərin aşkarlanması və onun kollektiv həlli məqsədilə mütəmadi ünsiyyət daxildir", - Assosiasiya rəhbəri qeyd edib.
Ölkədə fəaliyyət göstərən bütün sığorta şirkətlərinin daxil olduğu Azərbaycan Sığortaçılar Assosiasiyası 2006 - cı ilin dekabrında təsis edilib. ASA-nın Müşahidəçi Şurasına MBASK, Standard Insurance, Beynəlxalq Sığorta Şirkəti, Azərsıgorta, Atəşgah daxildir. Azer-Asia və Gorgud Sıgorta-nın lisenziyalarının Maliyyə Nazirliyi tərəfindən ləğv edilməsinə baxmayaraq, onlar hələ də Assosiasiya üzvü olaraq qalırlar.