Azərbaycan, Bakı, 18 oktyabr/ Trend , müxbirlər İ.Əlizadə, E.İsmayılov/Şənbə günü Milli Məclisin Iqtisadi siyasət üzrə daimi komissiyası Azərbaycan hökuməti və Fransanın BNP Paribas bankı arasında avtomobil yollarının yenidən qurulması üzrə 320 mln.dollarlıq kredit razılaşmasını təsdiq edib və parlamentin müzakirəsinə tövsiyə edib.
Bu vəsaitlər Bakı - Şamaxı - Yevlax (280 km), Muğanlı -Yevlax (156 km), Yevlax - Zaqatala - Gürcüstan sərhədi (164 km) avtomobil yollarının yenidən qurulmasına xərclənəcək.
Kredit 14 il müddətinə nəzərdə tutulub (ilk dörd il güzəştlidir). Borca götürülmüş məbləğin qalan hissəsi 10 il ərzində 20 tranşda (hər altı ayda) qaytarılacaq. Kredit üzrə tarif dərəcəsi 0,45 faiz məbləğində müəyyənləşdirilib.
Kredit razılaşması İsrailin Ashra sığorta şirkəti tərəfindən sığorta edilib, bu şirkətin borcdakı payı 0,65 faizdir.
Bu yolların yenidən qurulmasına ümumilikdə 400 mln.dollar lazım olacaq. Onlardan 320 mln. kredit, 80 mln. Azərbaycanın hesabına ödəniləcək.
