Azərbaycan, Bakı, 21 oktyabr/ Trend , müxbir İ.Xəlilova/ "Azərbaycan Milli Bankı nəzdində fəaliyyət göstərən Azərbaycan İpoteka Fonduna dünya maliyyə böhranı şəraitində, ipotekanın sonrakı maliyyələşdirilməsi üçün banklara vermək məqsədilə, xarici borclanma cəlb etmək çox çətin olacaq", - Beynəlxalq Maliyyə Korporasiyasının (BMK) Azərbaycan və Mərkəzi Asiyada ipoteka kreditləşdirməsi üzrə eksperti Qart Bedford (Garth Bedford) bildirib.
"Azərbaycanın daxili bazarında AİF - ə vəsait təqdim edə biləcək bir neçə likvidli bank olsa da, beynəlxalq sərmayədarlardan vəsait cəlb etmək çətin olacaq", - Bedford bildirib.
Fondun düzgün iş strategiyası olarsa, BMK kimi təşkilatlar onun maliyyələşdirilməsində maraqlı ola bilər. Lakin yenə də hər şey ipotkea istiqrazlarının buraxılmasından asılıdır. BMK - nın Azərbaycanda ipotekanın maliyyələşdirilməsi üzrə şərtləri inflyasiyanın səviyyəsindən asılı olacaq və onun daim dəyişməsi ilə əlaqədar, Korporasiyanın eksperti BMK - nın kreditləri üzrə faiz dərəcələrinin səviyyəsini bildirməkdə çətinlik çəkib.
"Kredit dərəcələri 20 faizi ötürsə, müştərilərə ona xidmət göstərmək çox çətindir, - Bedford bildirib. - Bu yanaşma sərmayədarlara pul gətirsə də, belə yüksək dərəcə istehlakçı üçün çətinlik törədəcək. Bununla əlaqədar, biz ipoteka kreditlərinin alınmasının daha ucuz olması üçün, Azərbaycan banklarının birbaşa maliyyələşdirilməsinə üstünlük verdik".
Mənzilin maliyyələşdirilməsi üçün $15 mln. məbləğində birinci kredit UniBank - a, $5 mln. məbləğində ikinci kredit xətti Azerdemiryolbank - a ayrılıb. Bu vəsaitlər Housing Finance Proqramı çərçivəsində ayırılır və Azərbaycanda ipoteka kreditləşdirməsinin inkişafı üçün nəzərdə tutulub. Housing Finance Proqramına uzunmüddətli ipoteka maliyyələşdirməsinin təmin edilməsi və məsləhət xidmətlərinin göstərilməsi daxildir.
"Hazırda biz daha bir bankın imkanlarını nəzərdən keçiririk və sərmayələrin yatırılması barədə qərarımız bu bankın keyfiyyətindən asılı olacaq, - Korporasiyanın eksperti bildirib. - Sərmayələr bu il yatırıla bilər".
BMK tərəfdaş bankı seçərkən iki amilə əsaslanır - səmərəli şəffaflıq və korporativ idarəetmə.
Ölkədə AİF- in standartları üzrə ipoteka kreditləşdirməsi 2006 - cı il martın 25 - də, sosial ipoteka fevralın 7 - də başlayıb. İpoteka kreditlərinə tələbat büdcədən ayrılmış vəsaitləri ötüb və iyunun ortalarından AİF öz standartları üzrə ipoteka kreditlərinin maliyyələşdirilməsini dayandırıb. Fond 2005 - 2007 - ci ildə dövlət büdcəsindən 46 mln. manat alıb və 2008 - ci ildə daha 34 mln. manat alacaq. Fondun banklara verdiyi kreditlərin maliyyələşdirilməsi üçün bu vəsaitlərdən 10 mln. manat həcmində ilk tranş artıq ayrılıb. AİF standartları üzrə kredit portfeli 67,8 mln. manat təşkil edir. Bankların ümumi ipoteka portfelinin həcmi 250 - 300 mln. manat təşkil edir.
Kreidtlər üzrə dərəcələr 8 faizdən (AİF- in standartları üzrə) kommersiya banklarında 18 - 20 faizədək, müddət 10 ildən 25 ilədək dəyişir.
Oktyabrın 21 - nə olan cari mübadilə məzənnəsi -- 0,8095 AZN/USD.
Müəlliflə əlaqə saxlamaq üçün elektron ünvan: [email protected]
