Azərbaycan, Bakı, 29 oktyabr/ Trend , müxbir E.İsmayılov, İ.Xəlilova/ 2009-cu ilin əvvəlindən Ələt-Astara (İran sərhədi) avtomobil yolunun qalan hissələrinin tikintisinə başlanılacaq. Bu barədə Azərbaycan nəqliyyat nazirinin müavini Musa Pənahov bildirib.
"22 kilometrlik yolun tikintisi başa çatır, yolun qalan hissələri üzrə tender sənədləri hazırlanır. Yəqin ki, gələn ilin əvvəlindən qalan hissələrin tikintisinə başlanılacaq", - deyə Pənahov bildirib. Yeni dördzolaqlı yolun eni 27,5 metr təşkil edir.
Layihəyə 195 km uzunluğunda olan Ələt-Astara yolunun yeni hissəsinin tikintisi daxildir. Bu göstəricinin 30 km-i mövcud yolda yerləşəcək. Qalan 165 km isə mövcud Bakı-Astara trassından asılı olmayan yeni yol qismində səkiləcək ki, bu da məsafənin azalmasına imkan yaradacaq. Hazırda Bakı-Astara yolunun uzunluğu 313 km-dir, yeni yolun tikilməsindən sonra isə o, 265 km təşkil edəcək. Dördzolaqlı trassın eni təqribən 27- 30 metr təşkil edəcək. Tikintini "Akkord" şirkəti həyata keçirəcək. Bakı-İran sərhədi layihəsinin tam olaraq 2012-ci ildə başa çatdırılması planlaşdırılır.
Ələt-Masallı yolunun tikintisi Dünya Bankı (DB) tərəfindən 10 illik güzəştli dövr ilə 40 il müddətinə ayrılacaq kredit hesabına həyata keçiriləcək. DB magistral avtomobil yollarının müasirləşdirilməsi və yenidən qurulması üçün Azərbaycana 300 mln. dollar təqdim edib.
Kredit şərq-qərb və şimal-cənub marşrutları üzrə avtomobil yollarının yenidən qurulması üzrə işlərə sərf olunacaq.
Azərbaycan ilə Rusiya və İranı birləşdirən Ələt-Masallı (İran istiqaməti) və Tağıyev-Sahil (Rusiya istiqaməti) yollarının, həmçinin yerli əhəmiyyətli 200 km-lik yolun müasirləşdirilməsi üçün əlavə vəsait ayrılacaq.
Masallı-Astara yolu sahəsinin tikintisi Asiya İnkişaf Bankının 200 mln. dollar həcmində olan krediti hesabına həyata keçiriləcək. Bu məbləğ 500 mln. dollarlıq ümumi kreditdən ilk tranş qismində təqdim olunacaq. Masallı-Astara avtomobil yoluna kredit "Multitranche Financing Facility" (MFF) mexanizmi çərçivəsində təqdim olunub və üç yol layihəsinin maliyyələşdirilməsi üçün nəzərdə tulub. Bu günədək hələ ki, bir layihə razılaşdırılıb, MFF-in qalan vəsaitinin istifadəsi üçün bank 2014-cü ilədək vaxt verib.
Məqalə müəllifi ilə əlaqə ünvanı - [email protected]
