Azərbaycan, Bakı, 07 noyabr/ Trend , müxbir Ü.İsmayılova/ "Ötən ilin analoji dövrü ilə müqayisədə, yanvar-sentyabrda Azərbaycan əhalisinin gəlirləri 35,6 faiz artıb", - Dövlət Sosial Müdafiə Fondunun (DSMF) rəhbəri Səlim Müslümov cümə günü parlament komissiyalarının ölkənin 2009-cu ilin dövlət büdcəsinin müzakirəsinə həsr edilmiş birgə iclasında bildirib.
Onun sözlərinə görə, əhalinin adambaşına düşən gəlirləri 34,1 faiz, aylıq əmək haqqı - 70,1 faiz, əmək pensiyasının orta aylıq səviyyəsi - 62,5 faiz artıb.
10 ay ərzində DSMF-in gəlirləri 1,74 mln. manat təşkil edib ki, bu da 2007-ci ilin analoji dövründən 35 faiz çoxdur. Büdcə təşkilatları və icbari sosial sığorta ödənişləri üzrə gəlir proqnozları 100,1 faiz yerinə yetirilib.
2007 - ci ilin analoji dövrü ilə müqayisədə, yanvar-oktyabrda icbari sosial sığortadan daxilolmalar 34 faiz - 717 mln. manatadək artıb.
Sahibkarlıq fəaliyyəti ilə məşğul olan şəxslərin icbari sosial sığortası üzrə ödənişlər 79 faiz artıb.
Yanvar-oktyabr ərzində dövlət büdcəsindən DSMF-in büdcəsinə transfertlər 356 mln. manat təşkil edib.
2008 - ci ildə yaşa görə pensiyaların baza hissəsi 50, onun sığorta hissəsi isə, 16,7 faiz artıb.
Müəlliflə əlaqə saxlamaq üçün elektron ünvan: [email protected]
