Azərbaycan, Bakı, 02 dekabr / Trend , müxbir N.İsmayılova/ Dünyanın aparıcı şirkətlərinin atomobil dilerləri Azərbaycanda satılan avtomobillərə güzəşt təqdim etməyə başlayıblar. Güzəştlərin həcmi iki faizdən 10 faizədək dəyişir. Bu gün üçün güzəşt təqdim etməyən bəzi dilerlər bunu yaxın günlərdə etmək niyyətindədirlər.
Nissan avtosalonundan bildiriblər ki, nəqd avtomobil alan müştəriyə 2 faiz güzəşt olunur. Oktyabrda 4 faiz güzəşt təklif olunub, noyabrdan bu göstərici iki faizədək enib.
Hyundai avtosalonundan deyiblər ki, şirkət maşınlara güzəşt təklif etməyib, amma hazırda bütün Azərbaycan ərazisində hədiyyə kampaniyası qüvvədədir - Hyundai avtomobilinin alıcısı eyni zamanda televizor və ya maye-kristal monitor da əldə etmiş olur.
Subaru avtosalonu avtomobili nəqd alan müştərilərinə iki faiz güzəşt təklif edib. Kampaniya oktyabrdan başlayıb və onun yeni ilədək davam edəcəyi ehtimal olunur. Bu aksiya baş ofislə razılaşdırılmış şəkildə həyata keçirilir, - Subaru-nun Azərbaycandakı nümayəndəliyindən deyiblər.
Toyota Center Baku şirkəti 2008 - ci il buraxılışı olan Pradovə RAV4 markalarına 10 faizlik güzəşt kampaniyasına başlayıb. Aksiya dekabrın 1- dən yanvarın 1- dək davam edəcək. Güzəşt kampaniyası baş ofislə razılaşdırılıb, -Toyota-nın Azərbaycandakı nümayəndəliyindən bildiriblər.
Audi və Volkswagen avtosalonlarında qeyd ediblər ki, onlarda güzəşt kampaniyası yoxdur, amma 10 gün sonra belə kampaniyaya başlamağı planlaşdırırlar. Hazırda rəhbərlik qiymətlərə olan güzəştləri müəyyənləşdirməlidir.
Ford və Mitsubishi avtosalonlarında söyləyiblər ki, rəhbərlik və baş ofis hələlik güzəşt tətbiq etməyi düşünmür.
Müəlliflə əlaqə ünvanı: [email protected]
