Azərbaycan, Bakı, 04 dekabr/ Trend , müxbir E.İsmayılov/ "Azərbaycanın Nəqliyyat Nazirliyi gələn ilin ortalarında yeni Bakı Beynəlxalq Dəniz Ticarət Limanının tikintisi üzrə podratçının müəyən edilməsinə tender elan etmək niyyətindədir", - nəqliyyat nazirinin müavini Musa Pənahov cümə axşamı bildirib. Bundan sonra tikinti işlərinə başlanılacaq.
Yeni limanın yaradılması üzrə bütün işləri 2015-ci ildə bitirmək nəzərdə tutulur. Hazırda limanın layihələndirilməsi həyata keçirilir, - Pənahov əlavə edib.
Əvvəllər Koreyanın GS Engineering & Construction şirkəti layihənin texniki - iqtisadi əsaslandırılması və ilkin layihə işlərinin yekunlarını başa çatdırıb və təqdim edib. Limanın tikintisinə 2009-cu ildə başlamaq planlaşdırılır.
Yeni multimodal dəniz limanı tikiləcək; gələcəkdə bu ərazidə loqistika mərkəzindən başqa, azad iqtisadi zonanın yaradılması planlaşdırılır.
Ələt qəsəbəsində yeni beynəlxalq dəniz limanının tikintisi üç mərhələdə həyata keçiriləcək və 2015 - ci ilə başa çatacaq. Layihənin 2008 - 2010 - cu illəri əhatə edən birinci mərhələsi iki bərə, konteynerlərin, "ro-ro" tipli gəmilərin və adi (universal) quru yük gəmilərinin qəbulu üçün üç yük körpüsünün tikintisini nəzərdə tutur. Layihənin ikinci mərhələsi 2011-2013-cü illəri əhatə edir və daha üç, üçüncü mərhələ (2014 - 2015 - ci illər) əlavə olaraq 2 yük körpüsünün tikilməsini nəzərdə tutur. Limanın tikintisi layihəsi 400 mln. dollardan çox qiymətləndirilir.
Müəlliflə əlaqə saxlamaq üçün elektron ünvan: [email protected]
