Azərbaycan, Bakı, 07 yanvar/ Trend , müxbir Ü.İsmayılova/ Azərbaycanın ən böyük lizinq şirkətlərindən biri - 100 faiz Latviya kapitalına məxsus Parex Leasing & Factoring MMC yaxın bir neçə ayda maliyyələşdirməni bərpa etmək niyyətindədir. Dünya maliyyə böhranının təsisçi Lativiyanın Parex Bank-a təsiri ilə əlaqədar, lizinq şirkəti dekabrda yeni layihələrin maliyyələşdirilməsini dayandırıb, - şirkətdən çərşənbə günü bildiriblər.
"Fəaliyyətimizi və könhə layihələrlə işi davam etdiririk, - Parex Leasing & Factoring-dən qeyd ediblər. - Tezliklə şirkətimiz əvvəlki rejimdə işə başlaya biləcək. Belə ki, təsisçinin məlumatına görə, böhran nəticəsində yaranmış problem yaxın bir neçə ayda həll olunacaq".
Noyabrda Latviya hökuməti növbədənkənar iclasda, Parex Bank-ı müflisləşməkdən xilas etmək üçün, bankın kapitalında səhm nəzarət paketinin alınması barədə qərar qəbul edib. Hökumətin aldığı bankın 51 faizlik səhm paketi dövlətə məxsus Latvijas Hipotеku un zemes banka veriləcək.
Dekabrın 3 - də hökumətin təcili iclasında Parex Bank-ın səhmlərinin 84,83 faizini nəzarətə almaq barədə qərar qəbul edilib. İndi isə tam nəzarətin 100 faiz verilməsi barədə söhbət gedir. Dövlət bankın sindikatlaşdırılmış kreditlərinə zəmanət verməyi də öhdəsinə götürüb.
Parex Bank Latviyanın ən iri bankıdır. 2008 - ci il aprelin sonuna olan məlumatlara görə, bank 19,8 faiz bazar həcmi ilə cəlb edilmiş əmanətlərin həcmi üzrə respublikada birinci, 14,4 faiz bazar payı ilə aktivlərin böyüklüyünə görə ikinci yeri tutub.
Parex Leasing & Factoring 2005 - ci ilin martından fəaliyyət göstərir. Şirkətin Nizamnamə kapitalı 50 min manat səviyyəsində ödənilib. Avqustun əvvəlinə şirkətin lizinq portfeli 46,9 mln. dollar təşkil edib.
Parex Bank-ın lizinq şirkətləri Moskva, Sankt - Peterburq, Kiyev, Minsk, Tallin və Vilnüsdə də fəaliyyət göstərir.
Müəlliflə əlaqə saxlamaq üçün elektron ünvan: [email protected]
