Azərbaycan, Bakı, 13 yanvar/ Trend , müxbir Ü.İsmayılova/ İslam İnkişaf Bankının qrupuna daxil olan Özəl Sektorun İnkişafı İslam Korporasiyası 5 mln. manat Nizamnamə kapitalı ilə Azerbaijan Leasing Sirketi MMC lizinq şirkətini Azərbaycanda qeydiyyatdan keçirib, - Azərbaycanın Vergilər Nazirliyindən çərşənbə axşamı bildiriblər.
Şirkət dekabrın 12-də qeydiyyata alınıb.
Beynəlxalq Maliyyə Korporasiyasının (BMK) proqnozlarına görə, yaxın gələcəkdə Azərbaycanın lizinq bazarının həcmi 500 mln. dollara çatacaq. 2008 və 2009 - cu illərdə ölkədə lizinq əməliyyatları ölçüsünün 250-300 mln. dollar səviyyəsində olacağı gözlənilir.
BMK-nın hesablamalarına görə, Azərbaycanda lizinqlə məşğul olan şirkət və bankların sayı 20-dən çoxdur. Lakin bu sahədə cəmi 5 - 6 şirkət fəal işləyir. Bu fakt lizinq sahəsində ixtisaslaşmış kadrların yoxluğu ilə izah olunur. Bununla yanaşı, banklar bu lizinq strukturlarını departament və ya törəmə şirkət qismində yaratmaq barədə qərara gəldikdən sonra, onların siyahısının genişlənəcəyi gözlənilir. 2008-ci il ərzində ölkədə beşədək lizinq şirkəti qeydiyyata alınıb.
Lizinq şirkətlərinin başlıca problemlərindən biri orta hesabla 1 mln. dollar təşkil edən aşağı kapitallaşma səviyyəsidir. Belə kapital səviyyəsi beynəlxalq maliyyə institutlarına onları birbaşa maliyyələşdirməyə imkan vermir.
İslam Korporasiyası beynəlxalq maliyyə təşkilatının əsas məqsədi üzv ölkələrdə və İİB-in üzvü olmayan müsəlman dövlətlərində şəriət qaydalarına uyğun iqtisadi inkişaf və sosial tərəqqiyə yardım göstərməkdir.
İİB 1975-ci il oktyabrın 20-də yaradılıb, mənzil- qərargahı Ciddədə (Səudiyyə Ərəbistanı Krallığı), regional ofisləri Rabatda (Mərakeş), Kuala-Lumpurda (Malayziya) yerləşir. İİB-in Almatıda nümayəndəlik ofisi var.
Yanvarın 13-nə olan cari mübadilə məzənnəsi --0,8029 AZN/USD.
Müəlliflə əlaqə saxlamaq üçün elektron ünvan: [email protected]