Azərbaycan, Bakı, 14 yanvar/ Trend , müxbir N.İsmayılova/ Azərbaycanda korporativ idarəetmə Məcəlləsinin qəbulu bu standartları tətbiq etmiş şirkətlərə sərmayələrin cəlb edilməsinə daha çox imkan verəcək, - İqtisadi İnkişaf Nazirliyinin Korporativ İdarəetmə şöbəsinin rəisi Sənan Tapdıqov çərşənbə günü Məcəllənin hazırlanması üzrə konfransda bildirib.
"Məcəllə layihəsinin hazırlanması zamanı bir sıra çətinliklərlə üzləşsək də, indi biz cəsarətlə görə bilərik ki, nəyə nail olmuşuq", - Tapdıqov deyib.
Onun sözlərinə görə, korporativ idarəetmə standartlarını tətbiq edən şirkətlər kapital bazarlarına daha geniş çıxış alacaqlar, onların sərmayələrin cəlb edilməsi üçün də böyük imkanları var.
Azərbaycanda korporativ idarəetmə standartlarının tətbiqi üçün müəyyən tədbirlər artıq görülüb. Azərbaycan İnvestisiya Şirkətinin iştirakı ilə bu sahədə normativ -hüquqi bazanın təkmilləşdirilməsi üçün işçi qrupu yaradılıb.
"Dünya iqtisadiyyatı maliyyə böhranı yaşadığı vaxtda korporativ idarəetmə yaxşı inzibati tədbirdir və Azərbaycanda Məcəllənin hazırlanması vacibdir", - Dövlət Qiymətli Kağızlar Komitəsinin (DQKK) sədri Rüfət Aslanlı bildirib.
"Məcəllənin tətbiqi özəl və dövlət sektorları arasında dialoqu inkişaf etdirməyə kömək edəcək", - Beynəlxalq Maliyyə Korporasiyasının (İFC) Azərbaycandakı nümayəndəliyinin rəhbəri Aliyə Əzimova bildirib.
Korporativ Məcəllə layihəsinin hazırlanması üçün yaradılmış işçi qrupuna iqtisadi inkişaf, ədliyyə nazirlikləri, Milli Bank, DQKK, Azərbaycan İnvestisiya Şirkəti və İFC- nin nümayəndələri daxildirlər. Belə Məcəllənin qəbulu Azərbaycanda korporativ idarəetmə sistemini təkmilləşdirməyə imkan verəcək, biznesin imkanlarını genişləndirəcək, şirkətlərin fəaliyyətinin səmərəliliyini artıracaq.
Perspektivdə işçi qrupu korporativ idarəetmə konsepsiyasını hazırlamağı planlaşdırır.
Müəlliflə əlaqə saxlamaq üçün elektron ünvan: [email protected]