Azərbaycan, Bakı, 10 fevral / Trend , İ.Хəlilova, C.Babayeva/ Azərbaycan parlamenti müzakirəsi fevralın 10-da keçirilmiş "Cinayət yolu ilə əldə olunmuş pul vəsaitləri və əmlakın leqallaşdırılmasına və terrorizmin maliyyələşdirilməsinə qarşı fəaliyyət" qanun layihəsini üçüncü oxunuşda qəbul edib.
"Qanun Azərbaycandakı iqtisadi subyektlər və sahibkarların fəaliyyətinə heç bir təhlükə törətmir", - "çirkli" pulların yuyulmasına qarşı qurumlararası işçi qrupun başçısı, Qiymətli Kağızlar üzrə Dövlət Komitəsinin sədri Rüfət Aslanlı bildirib.
Onun sözlərinə görə, qanun ümumilikdə hökümətin tədbirlərində sistemliliyi təmin edəcək.
Əvvəlki müzakirələrdən sonra qanun layihəsinə şübhə doğuran sövdələşmələrlə bağlı dəyişikliklər əlavə edilib. Buna əsasən maliyyə monitorinqi orqanları əməliyyatların limit və dəqiqlik dərəcələrindən asılı olmayaraq, onlar haqda məlumatı maliyyə kəşfiyyatı orqanlarına çatdırmalıdır.
Monitorinqə kredit, sığorta və yenidən sığorta təşkilatları; qiymətli kağızlar bazarının peşəkar iştirakçıları; kredit təşkilatlarının lizinq xidmətləri; poçt şöbələri vasitəsilə pul köçürmələri; digər təşkilatların, lombardların, sərmayə fondlarının fəaliyyəti; qiymətli metal və daşlar üzrə sövdələşmələr və onlardan hazırlanan əşyaların alınması; qeyri-hökümət və dini təşkilatlar, lotereya təşkilatçıları; daşınmaz əmlakın alqı-satqısı üzrə xidmət göstərən şəxslər (rieltorlar), eləcə də vəkillər, auditorlar, daşınmaz əmlakla bağlı sövdələşmələr, müştəri vəsaitləri, qiymətli kağızlar və əmlak, müştərilərin bank və depo-hesabları cəlb olunacaq. Monitorinqin həyata keçirilməsi üçün xüsusi dövlət orqanı yaradılacaq.
Qanun layihəsinə əsasən, ölkə prezidenti orqana maliyyə kəşfiyyatı funksiyaları almaq səlahiyyəti verəcək. Dünya təcrübəsində maliyyə kəşfiyyatı orqanları Mərkəzi banklarda, hüquq-mühafizə orqanlarında, prokurorluq, ədliyyə orqanlarında və ya müstəqil qurumlar kimi yaradıla bilir.
Hüquq siyasəti və dövlət quruculuğu üzrə daimi parlament komissiyasının sədri Əli Hüseynovun sözlərinə görə, maliyyə kəşfiyyatı orqanının yaradılması daha bir hüquq-mühafizə orqanının peyda olması demək deyildir. Çünki bu struktur yalnız nəzarət funksiyalarına malik olacaq.
Sövdələşmələr və əməliyyatlar üzrə monitorinq sisteminə düşən sövdələşmənin məbləği əvvəlki - 20 min manat səviyyəsində saxlanılıb.
Qanunun hazırlanması və beynəlxalq ekspertizası hələ 2005-ci ilin mayında başa çatmışdı. Qanun layihəsi ABŞ ədliyyə departamenti və Aİ, həmçinin Azərbaycan hökümətinin korrupsiya ilə mübarizə üzrə Dövlət Komissiyasının nümayəndələrinin iştirakı ilə müzakirəyə çıxarılmışdı.
Məqalə müəllifi ilə əlaqə ünvanı: [email protected]
