Azərbaycan, Bakı, 17 fevral / Trend , müxbir Ü.İsmayılova/ Azərbaycanda yanvar ayı ərzində istehlakçı qiymətləri indeksi 1,54 faiz düşüb. Bu barədə "İqtisadi araşdırmalar mərkəzi" QHT-nin çərşənbə axşamı yayılan məlumatında bildirilir.
Monitorinq ölkənin 11 rayonunda aparılıb. Yanvarda Bakıda defilyasiyanın səviyyəsi 2,06 faiz, bölgələrdə isə 1,04 faiz təşkil edib.
Ən yüksək defilyasiya səviyyəsi ərzaq məhsulları üzrə müşahidə olunub - 2,31 faiz, qeyri-ərzaq məhsulları üzrə 0,77 faiz, xidmətlər üzrə isə 0,49 faiz enmə qeydə alınıb.
2008-ci ilin yanvar ayına nisbətdə (illik hesablamalarla) istehlak qiymətləri indeksi 10,72 faiz artıb.
Ötən ay əsasən kərə yağı (10,92 faiz), günəbaxan yağı (9,79 faiz), qarğıdalı yağı (6,46 faiz), toyuq əti (9,77 faiz), mal əti (6,24 faiz), qoyun əti (6,10 faiz), həmçinin sement (9,41 faiz), elektrik burğusu (5,37 faiz), 750 problu qızılın (1,17 faiz) qiyməti düşüb.
Ən böyük enmə istixana xiyarları (22,89 faiz), heyva (17,38 faiz), nar (14,40 faiz), həmçinin "analgin" həbinin (18,62 faiz) qiymətlərində müşahidə olunub. Xidmət sahəsində yas mərasimlərinin keçirilməsi üçün nəzərdə tutulan çadırların icarə qiymətləri (5,20 faiz) düşüb.
Azərbaycan Dövlət Statistika Komitəsinin məlumatına görə, 2008-ci il ərzində ölkədə inflyasiyanın səviyyəsi 20,8 faiz təşkil edib.
Məqalə müəllifi ilə əlaqə ünvanı: [email protected]