Azərbaycan, Bakı, 26 fevral / Trend -ın müxbiri Ü.İsmaylova /
Sığortaçılar Assosiasiyası İdarə Heyətinin və MBASK sığorta şirkəti İdarə Heyətinin sədri Cəmil Məlikovun sözlərinə əsasən, Azərbaycanın sığorta şirkətləri sığorta bazarında yaranmış durğunluqdan yararlanıb həyat sığortasını inkişaf etdirməlidirlər.
"Həyat sığortası Azərbaycanda inkişaf etmədiyindən sığorta şirkətləri əlavə tədbirlər hesabına bu bazarın inkişafını dəstəkləməlidirlər", - Məlikov deyib.
Onun sözlərinə görə, Azərbaycan sığorta şirkətlərinin istifadə edə biləcəkləri yetərincə resurslar var.
"Bu istiqamətdə vacib addımlardan biri kimi cəmiyyətdə həyat sığortası vərdişini yaratmaq istiqamətində işlər görülməlidir. Çünki inkişaf etmiş ölkələrdə bu istiqamətdə aparılan işlər nəticəsində həyat sıfğortası sığorta bazarının 60%-i təşkil edir, Azərbaycanda isə bu rəqəm heç 1%-ə də çatmır", - Məlikov əlavə edib
Assosiasiya rəhbərinin fikrincə, Azərbaycanda 2006-cı ildə ipoteka kreditlərinin sürətlə tətbiqi zamanı həyat sığortası sözügedən kreditin əldə olunması üçün məcburi olduğundan inkişaf tapmağa başlamışdı. 2007-ci ildə sənədləşmə zamanı çoxlu xərc sərf olunduğundan bu bənd ipoteka razılaşmasından çıxarıldı.
Məlikov hesab edir ki, kredit götürənin mütləq həyat sığortasını tələb edən bəndin ləğvi bu növ sığortanan inkişafına zərbə vurub və hal-hazırda həyat sığortasının inkişafı sığorta şirkətlərinin özlərindən asılıdır.
"Sığorta şirkətləri indi yeni sığorta məhsulları işləməlidirlər və təqdim etdikləri xidmətlərin səviyyəsini artırmalıdırlar", - Məlikov vurğulayıb.
Azərbaycan Sığortaçılar Assosiasiyası Müşahidəçilər Şurasına MBASK, Standard Insurance, Beynəlxalq sığorta şirkəti, Azersigorta, Ateshgah sığorta şirkətləri daxil olmaqla, 2006-cı ilin dekabr ayında yaradılıb.
Məqalə müəllifi irlə əlaqə ünvanı: [email protected]