Qazaxıstan, Astana, 2 mart / Trend , müxbir K.Arınova / "Yaxın iki ay ərzində Qazaxıstan Azərbaycana səkkiz min ton taxıl tədarük etməyə hazırdır", - bazar ertəsi "Ərzaq müqaviləsi şirkəti" SC-nin xarici iqtisadi fəaliyyət departamentinin direktoru Daulet Uvaşov deyib.
"Cari ilin mart və aprel ayı ərzində biz, səkkiz min ton taxılımızı bizim "Bakı taxıl terminalı" birgə müəssisəmizə (BM) tədarük edə bilərik, - Uvaşev deyib. - Gələcəkdə biz Azərbaycana tədarükü artıra bilərik, çünki bu bazarda keyfiyyətli taxıla tələbat artır".
Bundan başqa, Qazaxıstan şirkətinin nümayəndəsinin məlumatına görə, ilin ortalarında Bakıda dəyirman kompleksinin fəaliyyətə buraxılışı planlaşdırılır.
"Biz burada, Bakıda öz taxılımızdan un və kəpək istehsal edə biləcəyik", - Uvaşev bildirib.
Onun sözlərinə görə, hazırda "Ərzaq korporasiyası" Azərbaycan tərəfi ilə Qazaxıstan taxılının bu il üçün qiyməti ətrafında danışıqlar aparır.
"Hazırda söhbət təxminən bir ton üçün 250-260 dollardan gedir. Azərbaycan ötən il yaxşı məhsulu olmuş Rusiyadan yetərincə taxıl alıb. Buna görə də taxılın qiymətini saxlaya bilir", - Uvaşev qeyd edib.
2008-ci ildə Azərbaycan Qazaxıstan taxılını bir tonu 280-300 dollara alıb.
"Ərzaq korporasiyası"nın nümayəndəsinin məlumatına görə, Qazaxıstanın taxıl ixracı potensialı ildə təxminən bir milyon tondur.
"Hazırda biz İranla fəal işləyirik və bizim İrana 2009-cu ildə 400 min ton taxıl tədarük etmək haqqında ilkin müqaviləmiz var", - Uvaşev vurğulayıb.
Uvaşevin sözlərinə görə, Gürcüstandan dünya bazarlarına tədarükə gəlincə, bu Gürcüstanın Batumi limanındakı taxıl terminalının tikintisi qərarı məsələsinin həllindən asılıdır.
"Bu məsələ ilə bağlı danışıqlar bu ilin yayında başlayacaq. Hazırda isə biz ancaq Azərbaycan bazarına taxıl tədarük edirik. Həmçinin onun nisbi şəkildə buradan Gürcüstana gedib çıxması da istisna deyil", - Uvaşev əlavə edib.
Məqalə müəllifi ilə əlaqə ünvanı: [email protected]
