Azərbaycan, Gəncə, 12 mart / Trend , müxbir V.Məmmədov /
Gəncədə daşınmaz əmlak bazarında durğunluq maksimum həddə çatıb. Bu barədə V.E.S Consultancy MMC-nin Gəncə filialının sədri Ceyhun Əliyev bildirib.
Onun sözlərinə görə demək olar ki, şəhərdə daşınmaz əmlak bazarında alqı-satqı sıfr səviyyəsinə enib.
"Hazırda demək olar ki, ev alqı-satqısı yox səviyyəsindədir. Pulu olan da ev almır, gözləyir ki, qimətlər aşağı düşsün", - Ceyhun Əliyev bildirib.
Rieltor Mirmehdi Tağıyevin bildirdiyinə görə, Gəncədə ev alanlar əsasən ətraf rayonlarda yaşayanlar və xüsusilə Rusiyada işləyənlər idi, lakin iqtisadi böhran nəticəsində Rusiyadan respublikaya pul az gəldiyindən ev alqı-satqısı da azalıb.
"Hazırda daşınmaz əmlak üzərində bir sıra əməliyyatlar gedir. Bunlar əsasən əvvəllər etibarnamə ilə ev alanlardır ki, indi bu prosesi rəsmiləşdirirlər. Digər proseslər isə evlərin hədiyyə edilməsi və vərəsəlik kimi aparılır", - deyə rieltor qeyd edib.
Gəncədə kirayə verilən evlərin qiyməti dəyişməyib. Bu, şəhərdə fəaliyyət göstərən mehmanxanalarda qiymətlər dəyişməməyi ilə əlaqədardır. Tağıyevin sözlərinə görə, Gəncədə kirayə evlərə tələbat azalıb.
V.E.S Consultancy-nin Gəncə filialının sədri Əliyev bildirib ki, iqtisadi böhran nəticəsində Gəncədə daşınmaz əmlakın qiyməti 30 faizə kimi azalıb. Alqı satqı isə 3 faiz civarındadır.
.
Məqalə müəllifi ilə əlaqə ünvanı: [email protected]