Azərbaycan, Bakı, 07 aprel / Trend , müxbir N.İsmayılova /
"İqtisadi İnkişaf Nazirliyi yanında Azərbaycan İxracın və İnvestisiyaların Təşviqi Fondu (AZPROMO) aprelin sonunda himayəçilərin toplantısını keçirəcək", - çərşənbə axşamı AZPROMO-nun prezidenti Rəhim Hüseynov deyib.
"Aprelin sonunda biz himayəçilərimizin illik yekun toplantısını keçirəcəyik, - Hüseynov deyib. - Görüşdə yeni rəhbərin himayəçilər şurasına təqdimatı, 2008-ci ilin hesabatı və 2009-cu ilin planının qəbulu kimi təşkilati məsələlərə baxılacaq".
AZPROMO başçısının sözlərinə görə, bu il həm də fond üzvlərinin sayının artması gözlənilir.
"Fond, həmçinin üzvlük haqqının səviyyəsinə yenidən baxılması və üzvlərin sayının genişləndirilməsi qərarını hazırlayır", - Hüseynov bildirib.
2007-ci ilə qədər, fondun əsasnaməsinə uyğun olaraq, üzvlərin sayı 55 nəfəri ötməməli idi. 2007-ci ilin yanvarındakı illik toplantıda bu limit aradan qaldırılıb.
"Əsas odur ki, onlar bizim fondun real üzvləri olsun, bizi dəstəkləsinlər", - Hüseynov qeyd edib.
Onun sözlərinə görə, ötən il AZPROMO-ya maliyyə dəstəyini himayəçilər şurasının üzvü olmayan 10-dan çox təşkilat verib və toplantıda şuraya onların fonda üzv qəbul olunmasının təklif olunması planlaşdırılır", - Hüseynov deyib.
Bu gün fondun 107 üzvü var. Üzvlük haqqının məbləği 4 min manatdır. Haqqlar fondun yalnız daimi üzvləri tərəfindən ödənilir, amma dövlət orqanları onlardan azaddırlar.
Aprelin 07-nə olan rəsmi məzənnə 0,8029 AZN/USD təşkil edir.
Məqalə müəllifi ilə əlaqə ünvanı: [email protected]