Azərbaycan, Bakı, 22 aprel / Trend , müxbir N.İsmayılova /
Beynəlxalq Maliyyə Korporasiyası (Dünya Bankı qrupunun üzvü, IFC) Azərbaycanda quşçuluq sahəsində lider olan Dəvəçi Broyler şirkətinə korporativ idareətmə təcrübələrini mühüm dərəcədə təkmilləşdirməyə kömək etməklə, şirkətin səhmdarlarının hüquqlarının daha yaxşı qorunması və yerli investordan səhmdar kapitalına qoyuluş formasında 14 mln. dollar məbləğində vəsaitin əldə edilməsi üçün imkan yaradıb. Bu barədə IFC-nin Azərbaycan Korporativ İdarəetmə Layihəsindən (AGGP) bildiriblər.
IFC-nin Azərbaycan Korporativ İdarəetmə Layihəsi ilə üç illik əməkdaşlığın nəticəsi olaraq, Dəvəçi Broyler hazırda Azərbaycanda azlıq təşkil edən səhmdarların hüquqlarının qorunması üçün müvafiq tədbirlər görən nadir şirkətlərdən biridir. Şirkət menecerlərin və sura üzvlərinin hüquq və vəzifələrini müəyyən edən yeni nizamnamə qəbul etmiş, korporativ katib vəzifəsini yaratmış və fəaliyyətinin etibarlığını qorumaq məqsədilə özünün daxili audit proseslərini təkmilləşdirib.
"Biz şirkətin gəlirliyi və istehsalının keyfiyyəti ilə onun korporativ idarəetmə təcrübələri arasında birbaşa əlaqənin olduğunu görürük", - Dəvəçi Broylerin İdarə Heyətinin sədri cənab Zakir Əzimov qeyd edib.
Göstərilən səylərin nəticəsi olaraq, şirkət daha qısa tezliklə keçirilən və daha effektiv səhmdarların ümumi yığıncaqlarını təşkil etmişdir. Dəvəçi Broyler həmçinin dividend siyasətini qəbul etmiş və müntəzəm sürətdə dividend ödəməyə başlamışdır ki, bu da bir çox Azərbaycan şirkətləri üçün uzaq perspektivdə olan məqamlardandır.
Mükəmməl korporativ idarəetmə Dəvəçi Broylerə Azərbaycan İnvestisiya Şirkəti kimi yeni səhmdarı cəlb etməyə imkan vermiş əsas faktorlardan biridir.
"IFC-nin dəstəyi şirkətin şəffaflığını artırmağa və fəaliyyətini təkmilləşdirməyə kömək edərək onu investorlar üçün daha cəlbedici etmişdir", - Dəvəçi Broylerin Müşahidə Şurasında AİŞ-in nümayəndəsi Anar Cəfərov bildirib
IFC-nin Azərbaycan Korporativ İdarəetmə Layihəsi Azərbaycanın şirkət və banklarına öz daxili təcrübələrini təkmilləşdirməyə və fəaliyyətlərini yaxşılaşdırmağa kömək edir. 2005-ci ildən etibarən Layihə 11 yerli şirkətə ümumilikdə 119.4 mln.dollar məbləğində investisiya cəlb etməyə kömək etmişdir. Layihə İsveçrənin İqtisadi Məsələlər üzrə Dövlət Katibliyi tərəfindən maliyyələşdirilir.
İFC yoxsulluğun azaldılması və insanların yaşayış səviyyəsinin yaxşılaşdırılması üçün imkanlar yaradır. 2008-ci maliyyə ili üçün korporasiyanın yeni investisiyalarının ümumi məbləği keçən illə müqayisədə 34 faiz artaraq 16.2 mld. ABŞ dolları təşkil edib.
Məqalə müəllifi ilə əlaqə ünvanı - [email protected]
