Azərbaycan, Bakı, 22 aprel / Trend /
"2009-cu ildə Azərbaycan üçün iqtisadiyyatın yeni inkişaf dövrü başlayıb", - çərşənbə günü Azərbaycan Prezidenti İlham Əliyev, Nazirlər Kabinetinin 2009-cu ilin ilk rübündə sosial-iqtisadi inkişafın yekunlarına həsr olunmuş iclasında deyib. AzTV telekanalı xəbər verib.
"Son beş il ərzində Azərbaycan iqtisadiyyatı 2,6 dəfə, sənaye istehsalı 2,5 dəfə, büdcə xərcləri təxminən 10 dəfədən çox artıb", - Prezident bildirib.
Azərbaycan Prezidenti deyib ki, "dünya maliyyə böhranının bütün ölkələrə təsir etməsinə baxmayaraq, ölkəmizdə son beş il ərzində aparılan uğurlu siyasət 2009-cu ilin ilk rübündə də sabit sosial-iqtisadi inkişafı təmin edib".
"Yanvar-mart ayları ərzində Azərbaycanın ÜDM-i ötən ilin analoji dövrünün göstəricisinə nisbətən 4,1 faiz artıb", - Prezident deyib.
"Bu, dünya maliyyə böhranı şəraitində böyük göstəricidir və qeyd etmək lazımdır ki, bütün problemlərə rəğmən qeyri-neft sektorunun artımı birinci rübdə 14 faiz təşkil edib", - Əliyev deyib.
Onun sözlərinə görə, ölkə iqtisadiyyatının belə yüksək tempinə ancaq neft-qaz sahəsinin hesabına deyil, güclü iqtisadi siyasət və aparılmış islahatlar hesabına nail olunub. "Maliyyə böhranı şəraitində Azərbaycan hökuməti sahibkarlığa dəstəyini davam etdirəcək və onların Sahibkarlığa Dəstək Fondu vasitəsilə maliyyələşdirilməsi artırılacaq", - Prezident bildirib.
Azərbaycan xarici sərmayədarlar üçün cəlbedici ölkə olaraq qalır və buna nümunə kimi Prezident İlham Əliyev 300 milyon avroluq sement zavodunun tikintisini göstərib.
Məqalə müəllifi ilə əlaqə ünvanı: [email protected]