Azərbaycan, Bakı, 28 aprel / Trend , müxbir İ.Xəlilova /
2009-cu ilin birinci rübünün yekunu üzrə Azərbaycan Beynəlxalq Bankının (ABB) xalis mənfəəti ötən ilin analoji dövr göstəricisi ilə müqayisədə 62,4 faiz artaraq 30,426 mln. manat təşkil edib. Bu barədə çərşənbə axşamı bankdan bildiriblər.
ABB birinci rübü 3 308,8 mln. aktivlə başa vurub ki, bu da 2008-ci ilin analoji dövr göstəricisi ilə müqayisədə 14,5 faiz çoxdur.
Bankın kredit portfeli 35,4 faiz artaraq 2 279,9 mln. manata çatıb. Bununla yanaşı, 320,8 mln. dollar ( 45,9 faiz artım ilə) istehsalkçı kreditlərinin payına düşüb.
Hüquqi və fiziki şəxslərin ümumi depozit həcmləri fiziki şəxslərin 451,3 mln. manatlıq (9,5 faiz artım) əmanətləri də daxil olmaqla, 5,7 faiz azalaraq 1 606,8 mln. manat (bank depozitlərini çıxmaqla) təşkil edib.
ABB-nın məcmu kapitalı 391,2 manat səviyyəsində formalaşıb. Bu həcmin 193,8 mln. manatı nizamnamə kapitalının payına düşür.
Xalis mənfəətin bankın aktivləri üzrə orta qalıqlara nisbəti (ROA göstəricisi) 0,76 faiz, xalis mənfəətin balans kapitalı üzrə orta qalıqlara nisbəti isə (ROE) - 5,86 faiz təşkil edir.
Aprelin 1-nə olan vəziyyətə görə, ABB-nın 37 filialı fəaliyyət göstərir (il ərzində bir filial açılıb). Bankın 592 bankomatı (14 ədə artıb), 2 664 POS-terminalı (ötən ilin birinci rübündə 2 397 ədəd) var.
Aprelin 28-nə olan rəsmi məzənnə 0,8036 AZN/USD təşkil edir.
Məqalə müəllifi ilə əlaqə ünvanı: [email protected]