Azərbaycan, Bakı, 01 may / Trend , müxbirlər İ.Xəlilova, N.İsmayılova /
"Azərbaycan Vergilər Nazirliyi vergi ödəyicilərinə xidmət məqsədilə 2009-2010-cu illərdə kompüter terminallarının quraşdırılması işini davam etdirəcək", - vergi ödəyicilərinə xidmət şöbəsinin rəhbəri Elçin Məmmədov bu gün deyib.
Bu günədək ərazi vergi orqanlarında 15 terminal quraşdırılıb.
"2009-2013-cü illərdə regionların sosial-iqtisadi inkişafı proqramı çərçivəsində bütün regionlarda kompüter terminalları quraşdırmaq niyyətindəyik və sözügedən prosesi gələn il tamamlamaq istəyirik", - Məmmədov qeyd edib.
Terminallar quraşdırılarkən vergi ödəyicisi çox olan regionlara üstünlük verilir.
Vergi terminalların tətbiqindən sonra 55%-dən artıq vergi ödəyiciləri dörd növ vergi üzrə deklarasiyaları elektron formatda təqdim edirlər. Şöbə rəhbərinin fikrincə, onların sayı daha da artacaq.
"Bu çox yaxşı göstəricidir. Çünki başlıca məqsədimiz vergi ödəyicilərinin deklarasiyanı elektron formatda təqdim etmələri olub və buna nail olduq", - Məmmədov deyib.
Elektron bildiriş sistemi 2003-2012-ci illər üçün kommunikasiya və informasiya texnologiyaları üzrə milli strategiyaya əsasən həyata keçirilir. Sənəddə elektron hakimiyyətin yaradılması qeyd olunub və bu səbəbdən dövlət orqanları qarşısında məsələ qaldırılıb.
Vergi terminallarının tətbiqi vergi ödəyicilərinə xidmət sisteminin müasir texnologiyalar vasitəsilə yeni mərhələyə keçidini xarakterizə edir.
Məqalə müəllifi ilə əlaqə ünvanı: [email protected]
