Azərbaycan, Bakı, 01 may / Trend , müxbir S.Babayeva /
"Quş qripi"nin qarşısının alınması və birgə fəaliyyətin əlaqələndirməsi üzrə Dövlət komissiyası Azərbaycanda H1N1 virusunun olmadığını elan edib.
"Azərbaycanda H1N1 virusunun qeydə alınması faktları aşkarlanmayıb. Profilaktika üçün Kənd Təsərrüfatı və Səhiyyə nazirlikləri tərəfindən bütün lazımi tədbirlər görülüb", - məlumata deyilir.
Dövlət komissiyası əhalidən qriplə bağlı şübhələrlə rastlaşdıqda tibb müəssisələrinə müraciət etməyi, təcili yardım çağırmağı, şəxsi gigiyena qaydalarına riayət etməyi və mümkün qədər xəstəliyin qeydə alındığı ölkələrə səyahət etməməyi məsləhət görür.
Dünya Səhiyyə Təşkilatının məlumatına əsasən, apreli 29-na qədər 9 ölkədə 1048 "donuz qripi"nə (A/H1N1) yoluxma halları qeydə alınıb. ABŞ hökuməti laborator şəraitdə təsdiq olunmuş 91 yoluxma faktı barədə məlumat verib ki, onlardan bir nəfər vəfat edib. Meksikadan 26 təsdiq olunmuş yoluxma faktı barədə məlumat daxil olub və onlardan 7 nəfəri ölüb.
Ölümlə nəticələnməyən yoluxma faktları barədə məlumat Avstriya (1), Almaniya (3), İsrail (2), İspaniya (4), Kanada (13), Yeni Zelandiya (3), Britaniya Krallığı və Şimali İrlandiyadan (5) daxil olub.
Məqalə müəllifi ilə əlaqə ünvanı: [email protected]
