Azərbaycan, Bakı, 04 may / Trend , müxbir İ.Xəlilova /
Azərbaycan Mərkəzi Bankı (AMB) mərkəzləşdirilmiş statistik məlumat bazasının yaradılmasında texniki dəstək almaqdan ötrü danışıqlar apardığı donorlar siyahısını genişləndirib. Bu barədə Statistika Departamentinin direktoru Elşən Cəfərov deyib.
"Biz İsveçrə Mərkəzi Bankında olduq və Dünya Bankı (DB) ilə məsləhətləşmələr apardıq. Hazırda statistik bazanın təkmilləşdirmə prosesində onların təkliflərini nəzərə alırıq", - Cəfərov qeyd edib.
Onun sözlərinə əsasən, DB ilə sözügedən istiqamətdə əməkdaşlığın perspektivləri müzakirə edilsə də maliyyə və texniki dəstək barədə razılaşma hələ əldə edilməyib.
"DB daha mükəmməl mərkəzləşdirilmiş statistik məlumat bazasının yaradılması sisteminə malikdir. Lakin dünya maliyyə böhranı ilə əlaqədar sözügedən sistem müəyyən dəyişikliklərə uğrayıb. Dünya iqtisadiyyatında digər tendensiyaları nəzərə alaraq bu dəyişikliklər daimi olaraq həyata keçirilməlidir", - Cəfərov deyib.
AMB İsveçrənin iqtisadi məsələlər üzrə Dövlət Katibliyinin (Seco) texniki yardımına ümid etsə də müsbət cavab almayıb. Buna səbəb isə serverin yaradılmasının Seco-nun texniki yardım göstərdiyi sahəyə aid olmamasıdır.
"Bu səbəbdən AMB statistik məlumat bazasının yaradılmasına öz resursları hesabına başlayıb və bu bankda əlavə maliyyə gərginliyinə səbəb olmayıb", - Cəfərov bildirib. Hazırda Türkiyə Mərkəzi Bankı (TMB) ilə məsləhətləşmələr aparılır. Türkiyə tərəfinin dəvəti ilə Azərbaycan mütəxəssisləri TMB-nin təcrübəsi ilə tanış olmaqdan ötrü qonşu ölkəyə səfər edəcək.
Mərkəzləşdirilmiş məlumat bazasının yaradılmasında İsveçrə, Türkiyə və Çexiya təcrübəsi əsas götürüləcək.
Layihənin qiyməti dəqiqləşdirilir. Cəfərovun sözlərinə əsasən, donorlar fərqli dəyərləndirmələr irəli sürür, yalnız daxili resurslardan istifadə edildikdə xərclər az olacaq.
Layihənin gerçəkləşdirilməsi 2-3 ilə nəzərdə tutulub.
Yeni məlumat bazasının yaradılması hazırkı sistemin təkmilləşdirilməsi və beynəlxalq standartlara uyğunlaşdırılması baxımından çox vacibdir.
Məlumat bazası AMB-nin restrukturizasiyasından sonra yaradılmış Statistika Departamenti üçün nəzərdə tutulub. İndi Departament bank nəzarəti və qəpik bazasının statistikasını aparır.
Məqalə müəllifi ilə əlaqə ünvanı: [email protected]
