Azərbaycan, Bakı, 4 may / Trend , müxbir Ü.İsmayılova /
"Azərbaycanda təqaüdlərin növbəti artımı 2010-cu ilin yanvarında gözlənilir", - bazar ertəsi Azərbaycan Dövlət Sosial Müdafiə Fondunun (DSMF) sədri Səlim Müslümov deyib. "Əmək pensiyası haqqında" qanuna əsasən Azərbaycanda ildə ən azı bir dəfə əmək təqaüdlərinin baza hissəsi artırılmalıdır.
Onun sözlərinə görə, ölkədəki bir sıra müəssisələrin məhsul realizəsi və dövriyyə vəsaitlərinin çatışmazlığı ilə bağlı problemlər üzündən fəaliyyətinin müvəqqəti olaraq dayandırılması əmək təqaüdlərinin vaxtlı-vaxtında ödənilməsində problem yaratmayacaq.
"Fondda "Azəri-Çıraq-Günəşli" layihəsində çalışan əcnəbi əməkdaşlara qoyulan maliyyə sanksiyalarının 2009-cu ildə ödənilməsi ilə əlaqədar olaraq ehtiyatlar yığılıb və bunlar ehtiyac olduqda əmək təqaüdlərinin maliyyələşdirilməsi üçün istifadə oluna bilər", - Müslümov deyib.
Azərbaycanda əmək təqaüdlərinin maliyyələşdirilməsi məcburi sosial sığorta və büdcə transfertləri hesabına aparılır. Hazırda ölkədə 70 mindən çox sosial sığorta ödəyicisi var.
Bu il fondun xərclərinin 93,5 faizi əmək təqaüdlərinin ödənilməsinə yönəldiləcək. Məcburi sosial sığorta ödəmələri 1 278,4 milyon manat səviyyəsində proqnozlaşdırılır ki, bu da 2008-ci ildəkindən 25,4 faiz çoxdur. Dövlət büdcəsindən transfertlər 495 milyon manat səviyyəsindədir (28,6 faiz artım).
Fondun xərcləri 1,775 milyard manat səviyyəsində proqnozlaşdırılır.
Mayın 04-nə olan rəsmi məzənnə 0,8034 AZN/USD təşkil edir.
Məqalə müəllifi ilə əlaqə ünvanı: [email protected]
