Azərbaycan, Bakı, 06 may / Trend , müxbir N.İsmayılova /
2009-cu ilin əvvəlindən etibarən Azərbaycan Mərkəzi Bankı (AMB) ölkənin valyuta bazarında bir milyard dollarlıq valyuta intervensiyası həyata keçirib. Bu barədə AMB-nin idarə heyətinin sədri Elman Rüstəmov çərşənbə günü deyib.
"AMB bir milyard dollara yaxın vəsaiti manatın kursunun sabit qalmasına yox, əhalinin dollar ehtiyatlarına yaranan tələbatına yönəldib", - Rüstəmov qeyd edib.
Onun sözlərinə əsasən, manatın məzənnəsinin sabitləşməsi üçün ödəmə balansı defisiti olduğu halda valyuta vasitələri yönəldilir və bu zaman bunu maliyyələşdirmək üçün vəsait tələb edilir.
"Hazırda ölkənin ödəniş və ticarət balansı defisitsizdir. Müvafiq olaraq valyuta ehtiyatları, əhali manat ehtiyatlarını dollarla dəyişmək istədikdə daxili məqsədlər üçün istifadə edilib. Lakin biz manatın məzənnəsinə cavabdehik", - AMB rəhbəri deyib.
Onun sözlərinə görə, hazırda valyutanın AMB-yə geri axını müşahidə edilir. Bu o deməkdir ki, əhali ölkədə devalvasiyanın olmayacağına əmin oldu və yenidən manata üz tutdu.
"12 MDB ölkəsində və Baltikyanı ölkələrdə devalvasiya baş verdi və əlbəttə ki, bu Azərbaycan əhalisinə psixoloji təsir göstərdi. Hazırda ölkədə devalvasiyaya heç bir əsas yoxdur", - Rüstəmov vurğulayıb.
AMB rəhbəri onu da əlavə edib ki, Azərbaycan milli valyutası hazırda regionun sabit valyutalarından biridir.
Mayın 06-na olan rəsmi məzənnə 0,8036 AZN/USD təşkil edir.
Məqalə müəllifi ilə əlaqə ünvanı: [email protected]
