Azərbaycan, Bakı, 07 may / Trend , müxbir N.İsmayılova /
Yayın sonunadək Bakı Fond Birjası ilə depozitçilər arasında elektron interfeysin yaradılması planlaşdırılır. Bu barədə Qiymətli Kağızlar üzrə Dövlət Komitəsinin (QKDK) sədri Rüfət Aslanlı bildirib.
"O vaxtadək broker və dilerlər tərəfindən uzaq məsafəli birja alqı-satqı sistemindən istifadə mümkün olacaq", - deyə Aslanlı bildirib.
Onun sözlərinə görə, bu, alqı-satqının avtomatlaşdırılması istiqamətində ilk addımı atmağa imkan yaradacaq.
Bakı Fond Birjası ötən ildən yeni alqı-satqı sisteminə keçməyə başlayıb. Alqı-satqı sistemi üçün proqram təminatı tədarükçüsü qismində Moskvanın İNİST şirkəti seçilib. Ümumilikdə, Fond Birjası proqramlı texniki vasitələrin (Server kompleksi) dərindən təkmilləşdirilməsinə başlayıb. Çünki birjada istifadə olunan alqı-satqı sistemi artıq köhnəlib. Praktiki olaraq artıq doqquz il keçib, server xidmətinin istifadə müddəti isə əməli olaraq 6-7 il təşkil edir.
Alqı-satqı sisteminin texniki cəhətdən təchizatı birjanın imkanlarının genişləndirilməsinə səbəb olacaq. Broker və diler şirkətləri tərəfindən uzaq məsafəli sistemdən istifadə üçün şaraitin yaradılması şəxsi proqramlarının yeniləməsini tələb edir.
Moskvanın ötən ilin yazında miqrasiya prosesini başa çatdıran İNİST şirkəti Bakı Banklarası Valyuta Birjası üçün də proqram təminatı tədarük edib.
Məqalə müəllifi ilə əlaqə ünvanı - [email protected]
