Azərbaycan, Bakı, 19 may / Trend , müxbir İ.Xəlilova /
Mayın sonuna Avropa Yenidənqurma və İnkişaf Bankı (AYİB) tərəfindən Milli Kart MMC-nin nizamnamə kapitalında pay ödənişi başa çatır. Bu barədə çərşənbə axşamı prosessinq mərkəzinin direktoru Cəlal Orucov deyib.
"AYİB mərkəzin kapitalında 10%-lik paya sahib olmaq üçün 500 min dollar vəsait ayırıb", - Orucov bildirib.
Onun sözlərinə əsasən, Milli Kart-ın kapitallaşması üçün büdcə var və hüquqi məsələləri həll etmək qalıb. Orucov qeyd edib ki, AYİB və digər səhmdarlar tərəfindən pay ödənişi həyata keçirildikdən sonra mərkəzin nizamnamə kapitalı hazırki 4 milyondan 5 milyon manata qalxacaq.
Milli Kart-ın fəaliyyətdə olan təsisçiləri mərkəzin işində pay iştiraklarının azalmasının qarşısını almaq üçün öz paketlərinin rekapitalizasiyasında iştirak etmək niyyətindədirlər.
Avropa Bankı da prosessinq mərkəzinə 250 min dollar həcmində texniki yardım edib.
Mlli Kart MMC 2006-cı ildə iyulun 14-də ölkənin 18 kommersiya bankı tərəfindən Azərbaycan Mərkəzi Bankından kart ödəmələri prosessinq mərkəzi alındıqdan sonra təsisi edilib. Üç il ərzində MMC Mərkəzi Banka aid sahədə icarə əsasında fəaliyyət göstərəcək. Sonra şirkət üçün ayrıca bina inşa ediləcək.
Hazırda məkəzin işində bankların minimal iştirakı 1%, maksimal iştirakı isə 10% təşkil edir.
Mərkəzin təsisçiləri Atabank, Azərdəmiryolbank, AzərTurkbank, Bank of Baku, Azerbaycan Senayye Bankası, Debütbank, Əmrahbank, Xalq Bank, Credo Bank, Access Bank, ParaBank, RabitəBank, Bank Respublika, Bank Standard, Texnika Bank, Turan Bank, UniBank və Zamin Bank-dır.
Mayın 19-na olan rəsmi məzənnə 0,8037 AZN/USD təşkil edir.
Məqalə müəllifi ilə əlaqə ünvanı: [email protected]
