Azərbaycan, Bakı, 20 may / Trend , müxbir İ.Хəlilova /
"Azərbaycanda iqtisadi siyasətin uğurlu realizəsi dünya iqtisadi və maliyyə böhranının ölkə büdcəsinə təsirindən qaçmaq imkanı verdi", - ölkə parlamentinin iqtisadi siyasət üzrə daimi komissiyasının sədri Ziyad Səmədzadə, 2008-ci il dövlət büdcəsinin yerinə yetirilməsi üzrə hesabatın müzakirəsi aparılan iclasın gedişində deyib.
"İqtisadi strukturlar arasında koordinasiya əməliyyatlarının gücləndirilməsi, pul-kredit siyasətinin yüngülləşdirilməsi sosial-iqtisadi strategiyanı realizə etmək, büdcə proqnozlarını yerinə yetirmək imkanı verdi", - Səmədzadə deyib.
Maliyyə naziri Samir Şərifov hesabatı təqdim edərkən deyib ki, son illərdəki artım tempi ölkə iqtisadiyyatının dinamik inkişafına nail olmaq imkanı verib və 2008-ci ilin ikinci yarısından etibarən dünya maliyyə böhranının dərinləşməsindən asılı olmayaraq Azərbaycan maliyyə sistemi artım tempini saxlayaraq möhkəmlənməkdə davam edib.
"2008-ci ildə əhalinin aztəminatlı hissəsinin sosial təminatının həcmi artıb, böyük sərmayə infrastruktur layihələrinin realizəsi davam etdirilib, ərzaq təhlükəsizliyi təmin edilib, sosial sektor üçün sərmayə proqramı genişləndirilib və iqtisadiyyatın real sektorunda əsas prioritet qeyri-neft sektorunun inkişafı olub", - nazir deyib.
Onun sözlərinə görə, bu tədbirlərin realizəsi sosial-iqtisadi proqnozların icrasına kömək edib. 2008-ci ilin yekunlarına görə ÜDM-in həqiqi artımı 10,8 faiz, adambaşına düşən ÜDM artımı isə 9,5 faiz təşkil edib. Əhalinin pul gəlirləri 2007-ci illə müqayisədə 77,8 faiz artıb. Adambaşına düşən gəlirdə bu fərq 36,7 faizdir. Ölkə iqtisadiyyatında çalışanların əmək haqqı 24,2 faiz artaraq 268 manata çatıb. Əhalinin 5,6 faiz artımı ilə kasıblıq həddindən aşağıda yaşayan əhalinin sayı 2003-cü illə müqayisədə üç dəfə azalıb.
Hesabat dövründə ölkə iqtisadiyyatında müşahidə olunan dinamik artım dövlət və ümumi büdcənin icrasına da təsir edib.
2008-ci ilin yekunlarına əsasən ümumi büdcənin gəlirləri 2,4 dəfə artaraq 19,52 milyard manata, xərclər isə 97,6 faiz artımla 12,464 milyard manata çatıb.
Dövlət büdcəsinin gəlirləri 79,9 faiz artımla 10,763 milyard manat, xərclər isə 77 faiz artımla 10,774 milyard manat olub. Şərifovun sözlərinə görə, büdcənin gəlir hissəsi 102,7 faiz, xərc hissəsi 97,4 faiz yerinə yetirilib. Qeyri-neft sektorundan daxilolmalar 2007-ci illə müqayisədə 42,8 faiz və ya 1,039 milyard manat artıb. Qeyri-neft gəlirlərinin xüsusi çəkisi 0,4 faiz artaraq 19,9 faiz təşkil edib.
Bununla yanaşı, 2008-ci ildə Vergilər Nazirliyi vergi yığımı üzrə proqnozların 105,9 faizini, Dövlət Gömrük Komitəsi 100,1 faizini yerinə yetirib. Dövlət Neft Fondunun transfertləri isə tam - 3,8 milyard manat həcmində köçürülüb.
Ötən il büdcə xərclərinin 27,5 faizi və ya 2,958 milyard manatı dövlət büdcəsinin sosial müdafiəli maddələrinin maliyyələşdirilməsinə yönəldilib. 2007-ci illə müqayisədə onların həcmi 44 faiz artıb.
Dövlət büdcəsinin kəsiri 11,562 milyon manat və ya ÜDM-in 0,03 faizi həcmində olub.
Parlament komitəsi 2008-ci il dövlət büdcəsinin icrası üzrə hesabatı qəbul edib və Milli Məclisin təsdiqinə göndərib.
Mayın 20-nə olan rəsmi məzənnə 0,8037 AZN/USD təşkil edir.
Məqalə müəllifi ilə əlaqə ünvanı: [email protected]