Azərbaycan, Bakı, 21 may / Trend , müxbir N.İsmayılova /
Əmlak Məsələləri üzrə Dövlət Komitəsində struktur dəyişikliklərinin edilməsi məsələsi yalnız struktur və əsasnamənin hazırlanması üzrə işlər başa çatdıqdan sonra nəzərdən keçiriləcək. Bu barədə Komitə rəhbəri Kərəm Həsənov bildirib.
"Hazırda Komitə struktur və əsasnamə hazırlayır, yalnız bu işlər başa çatdıqdan sonra struktur dəyişikliklər barədə məsələ həll olunacaq", - deyə Həsənov bildirib.
Onun sözlərinə görə, komitə icra orqanı kimi ölkə iqtisadiyyatının bu sahəsində səmərəliliyin təmin edilməsi məqsədi ilə müəyyən addımlar atacaq.
Azərbaycan Prezidenti İlham Əliyev 2009-cu il 19 may tarixində Əmlak Məsələləri üzrə Dövlət Komitəsinin yaradılması barədə fərman imzalayıb.
Nəticədə Azərbaycan Dövlət Əmlakının İdarə Edilməsi üzrə Dövlət Komitəsi ləğv edildi və onun bazasında Əmlak Məsələləri üzrə Dövlət Komitəsi yaradıldı. Həmçinin Azərbaycan Dövlət Reyestr Xidməti də ləğv edildi və onun bazasında Azərbaycan Əmlak Məsələləri üzrə Dövlət Komitəsinin nəzdində Daşınmaz Əmlakın Dövlət Reyestri Xidməti yaradıldı.