Azərbaycan, Bakı, 21 may / Trend , müxbir S.Babayeva /
Azərbaycanda qızıl və mis istehsal edən Anglo-Asian Mining PLC Azərbaycan Beynəlxalq Bankı (ABB) ilə 9,4 milyon dollar həcmində kredit razılaşması imzalayıb.
Şirkətdən verilən məlumata əsasən, vəsait zavod inşasının sonuncu mərhələsinə və "Gədəbəy" yatağının (Qərbi Azərbaycan) 300 kvadrat metr qızıl olan ərazisində faydalı qazıntıların hasilatına sərf ediləcək.
Kredit 15% illik faiz dərəcəsi ilə ayrılıb. Razılaşmanın müddəti 2013-cü il martın 13-də bitir. Vəsaitin ödənişi 9 ekvivalent köçürmə ilə həyata keçiriləcək. (ilk 8 tranş 1,044 milyon dollar məbləğində və 9-cu tranş 1,048 milyon dollar həcmində).
İlk köçürmə 2011-ci ilin martında, ikinci köçürmə isə 2013-cü ilin martınadək baş tutmalıdır.
Hazırkı razılaşma ABB tərəfindən şirkətə ayrılmış 25 milyon dollar məbləğində olan ssudaya əlavədir.
"Əlavə maliyyələşmə bizə kəşfiyyat kampaniyasından qızıl istehsal edən təşkilata keçid imkanı verəcək", - Anglo Asian-ın rəhbəri Rza Vəziri deyib.
Anglo Asian Mining PLC şirkəti Azərbaycan Hökuməti ilə 1997-ci ilin avqustunda imzaladığı razılaşmaya əsasən, Azərbaycanın cənub-qərbində yerləşən 6 yataqda hasilat işləri aparmaq hüququna malikdir (Gədəbəy, Ordubad, Qoşa bulaq, Qızıl bulaq, Vəncəli və Söyüdlü).
Məqalə müəllifi ilə əlaqə ünvanı: [email protected]