Azərbaycan, Bakı, 26 may / Trend , müxbir İ.Хəlilova/
"Almaniyanın KfW İnkişaf Bankı iki Azərbaycan bankına kənd təsərrüfatı kreditlərinin verilməsi metodlarının hazırlanması məqsədi ilə bir milyon avro həcmində texniki yardım ayırıb", - çərşənbə axşamı KfW-nin Bakı ofisinin başçısı Natiq Abdullayev deyib.
"Azərbaycanda kənd yerlərinin aqromaliyyələşdirilməsi layihəsi çərçivəsində KfW Bank Respublika, Azerdemiryolbank və qeyri-bank kredit təşkilatı CredAgro ilə əməkdaşlıq edir. Ancaq bankların kənd təsərrüfatı sahəsi üzrə maliyyələşdirilməsində təcrübə azlığı səbəbindən texniki yardımın göstərilməsinə qərar verilib", - Abdullayev bildirib.
KfW kənd təsərrüfatı layihəsinin dəyəri altı milyon avro təşkil edir ki, onlardan ikisi artıq Bank Respublika və CredAgro-ya ayrılıb. Bununla bağlı onlarla kredit müqavilələri imzalanıb.
Azerdemiryolbank-la müqavilə imzalanması bir qədər gecikir. Səbəb alman bankının onu bu prosesə bir qədər hazırlamaq istəyidir. Bu banka da həmçinin iki milyon avro kredit ayrılacaq.
İlk müqavilə CredAgro ilə imzalanıb. Banklarla müqavilənin gecikməsinə səbəb, konkret olaraq aqromaliyyələşdirmədə ixtisaslaşan CredAgro-dan fərqli olaraq, bankların bu sahədə bir qədər az təcrübəyə malik olmalarıdır.
Alman bankı vəsaitləri subordinasiya edilmiş kreditlər kimi ayırır. Baxmayaraq ki, bu kreditlər ikinci səviyyəli kapitala tətbiq olunur, onların vəsaitləri regionlardakı kənd əhalisinin kreditləşdirilməsi üçün nəzərdə tutulub.
Birinci mərhələdə Şəki-Zaqatala və Qax regionlarının kənd əraziləri əhatə olunacaq.
Kredit şərtləri Alman-Azərbaycan fondu vasitəsilə bankların maliyyələşdirilməsi şərtləri ilə eynilik təşkil edəcək.
CredAgro 2000-ci ildə ACDI-VOCA beynəlxalq humanitar təşkilatı tərəfindən təsis edilib. Təşkilatın nizamnamə kapitalı 5 min manat, məcmu kapitalı 7 milıyon manat təşkil edir.
Bu gün CredAgro-nun fəaliyyəti regionlarda layihələrin maliyyələşdirilməsinə yönəlib və 27 rayonu əhatə edir. Bununla əlaqədar olaraq o, doqquz nümayəndəlik yaradıb və yardımçı ofisləri var. Onun kreditləşmə sahələri müxtəlifdir - kənd təsərrüfatı kreditləşdirilməsi, ticarət əməliyyatlarının, infrastrukturunun, lizinqin maliyyələşdirilməsi, istehlak kreditləri. Bir sözlə ipotekadan başqa bütün istiqamətlər.
"Azerdemiryolbank" QSC öz fəaliyyətinə 1989-cu il oktyabrın 6-da "Azjeldorbank" KB kimi başlayıb. Son 18 ildə "Azerdemiryolbank" inkişaf edib və Azərbaycan bank bazarındakı mövqeyini daha da möhkəmləndirib. Bu gün "Azerdemiryolbank" QSC ölkənin beş ən böyük bankı sırasına daxildir. Paytaxt və regionları əhatə edən 29 filial və şöbələrə malikdir.
Bank Respublika öz fəaliyyətinə 22 may 1992-ci ildə başlayıb. Bankın prioritetlərindən biri fəaliyyət coğrafiyasının və müştərilərə xidmət şəbəkəsinin genişləndirilməsidir. Onun 19 filialı və 9 şöbəsi var.
Məqalə müəllifi ilə əlaqə ünvanı: [email protected]
