Azərbaycan, Bakı, 10 iyun / Trend , müxbir Ü.İsmayılova /
"İpoteka kreditləşməsinin bərpası Azərbaycan sığorta bazarına demək olar ki, təsir etməyib", - çərşənbə günü Azərbaycan Sığortaçılar Assosasiyasının idarə heyətinin sədri, MBASK sığorta şirkətinin rəhbəri Cəmil Məlikov deyib.
"İpoteka kreditində sığorta faizi orta hesabla kreditin 0,25 faizini təşkil edir", - Məlikov bildirib.
Onun sözlərinə görə, ipoteka kreditinin verilməsi limiti kreditlər üçün 14 milyon vəsait ayrılmasını nəzərə alaraq, bu, sığorta bazarında orta hesabla əlavə 35-50 min manat deməkdir.
"Nəzərə alsaq ki, birinci rübün yekunlarına əsasən bazarın həcmi təxminən 150 milyon manat təşkil edib, bu elə də böyük məbləğ deyil", - Məlikov qeyd edib.
Azərbaycan Mərkəzi Bankı nəzdində Azərbaycan İpoteka Fondu ipoteka kreditləşməsini iyunun 1-dən etibarən bərpa edib. Kreditləşmə 2007-ci ilin yayında, vəsait çatışmazlığı üzündən dayandırılmışdı.
"Azərbaycan bankları ipoteka kreditləşməsinə Azərbaycan Mərkəzi Bankı nəzdində Azərbaycan İpoteka Fondu xətti ilə, 10-15 gün ərzində başlayacaqlar", - çərşənbə axşamı AMB-nin idarə heyətinin sədri Elman Rüstəmov deyib.
"Əhali tərəfindən ipoteka kreditinin alınması ilə bağlı müraciətlər artır və banklar kreditləşməyə hazırlaşır. Ancaq o da məlumdur ki, ipoteka sənədlərinin buraxılışı hələ davam edir. Yaxınlarda bu proses başa çatacaq və 10-15 gün ərzində kreditləşmə başlayacaq" , - Rüstəmov bildirib.
AİF nominal dəyəri 1000 manat olan 55 min ədəd ipoteka istiqrazlarını qeydiyyatdan keçirib. Emissiyanın ümumi həcmi 55 milyon manat təşkil edir.
Onun sözlərinə görə, ipotekaya həm yeni tikililərdə, həm də köhnə mənzil bazarındakı evlərin cəlb edilməsi planlaşdırılır.
İyunun 10-na olan rəsmi məzənnə 0,8037 AZN/USD təşkil edir.
Məqalə müəllifi ilə əlaqə ünvanı: [email protected]