Azərbaycan, Bakı, 07 iyul / Trend , müxbir Ü. İsmayılova /
Azərbaycanın iri sığorta şirkətlərindən biri olan Qarant Sigorta özəl sığorta agentləri şirkətini - Qarant Sigorta Agenti QSC-ni yaradıb. Bu barədə Vergilər Nazirliyinin rəsmi saytına "vahid pəncərə" bölməsindən məlumat verilib.
"Yeni şirkət xüsusilə özəl və fiziki şəxslərə sığorta polisi hazırlayacaq", - Trend -a çərşənbə axşamı şirkətdən məlumat verilib.
Şirkətdən bildirilib ki, gələcəkdə Qarant Sigorta Agenti şirkətinin əməkdaşları həftəlik təlim kursları keçəcəklər, sonra sığorta agenti kimi fəaliyyət göstərəcəklər. İşin birinci mərhələsində əmək haqları faiz əsasında veriləcək.
Şirkətin nizamnamə kapitalı 100 manat təşkil edir. Qarant Sigorta Agenti-in rəhbəri Qarant Sigorta şirkətinin və ZQAN Holding-in təsisçisi Anar Cəlilovdur.
İyunun əvvəlində Qarant Sigorta "Ən yaxşı agent" aksiyası vasitəsiylə agentlərinin geniş siyahısı barədə məlumat yayıb. Azərbaycanın sığorta bazarında ilk dəfə keçirilən bu kampaniyanın əsas məqsədi gənclərə uğurlu karyera qurmaq üçün imkanlar yaratmaqdan ibarətdir. Nəticədə təxminən 500 adam sığorta agenti olmaq arzusunu bildirib.
Qarant Sigorta 2007-ci ilin noyabrında Maliyyə Nazirliyindən sığorta fəaliyyəti ilə məşğul olmaq üçün lisenziya alıb. Qarant Sigorta ZQAN Holding-in tərkibinə daxildir. Şirkətin nizamnamə kapitalı 4 milyon manat təşkil edir. Şirkət sığortanın 18 könüllü, 4 məcburi növündə fəaliyyət göstərir.
İyulun 7-nə olan rəsmi məzənnə 0,8042 AZN/USD təşkil edir.
Məqalə müəllifi ilə əlaqə ünvanı: [email protected]