Azərbaycan, Bakı, 17 iyul / Trend , müxbir Ü.İsmayılova /
Birinci yarımildə Azərbaycanda 131 müəssisənin fəlaiyyəti dayandırılaraq ləğv edilib. Bu barədə cümə günü Dövlət Statistika Komitəsindən bildirilib.
Ləğv edilən obyektlərin 14,5 faizi topdan və pərakəndə satış obyektləri, avtomobil və motosiklet təmiri məntəqələri, 13 faizi tikinti şirkətləri, 12,2 faizi informasiya və rabitə sahəsində fəaliyyət göstərən şirkətlərdir.
Bu dövr ərzində 2,97 min yeni müəssisə yaradılıb ki, onların da 25,6 faizi müxtəlif xidmətlər sahəsi, 24,8 faizi topdan və pərakəndə satış obyektləri, 15,2 faiz tikinti şirkətləri, 5,5 faiz peşəkar, elmi və texniki fəaliyyət sahələrində işləyənlər, 4,4 faizi emaledici sənaye, 4,2 faizi kənd, meşə təsərrüfatı və balıqçılıq müəssisələrinin payına düşür.
İyulun 1-də Azərbaycanda sahibkarlıq fəaliyyəti göstərənlərin sayı 88,875 min təşkil edib ki, onların da yarıdan çoxu - 54,9 faizi (48,756 min) paytaxtda, qalanları isə ölkənin digər şəhər və regionlarında fəaliyyət göstərənlərdir. Azərbaycan ərazisində fəaliyyət göstərən müəssisələrin 77 faizi (68,41 min) kiçik müəssisələrdir.
Birinci yarımildə Azərbaycanın Vergilər Nazirliyində 281,132 min sahibkar - fiziki şəxs qeydiyyatdan keçib.
Məqalə müəllifi ilə əlaqə ünvanı: [email protected]
