Azərbaycan, Bakı, 31 iyul / Trend , müxbir Ü.İsmayılova /
Azərbaycanın iri sığorta şirkətlərindən biri Paşa Sığorta xaricə gedən müştərilərini onların "donuz qripi"nə (A/H1N1) yoluxacağı təqdirdə sığortalamağa hazırdır. Bu barədə cümə günü şirkətin idarə heyətinin sədri Nofəl Rzayev deyib.
"Donuz qripi"nin müalicəsi elə də böyük xərc tələb etmir. Buna görə də müqavilə bağlamış müştərilər "donuz qripi"nə yoluxalacaqları təqdirdə xaricdə olsalar da müalicə alacaqlar", - Rzayev deyib.
Onun sözlərinə görə, "donuz qripi" şirkətin "fors-major" hadisəsi siyahısına daxil deyil.
Digər sığorta şirkətinin - Başak İnamın idarə heyətinin sədri Orxan Hüseynov hesab edir ki, "donuz qripi"nə və ya digər uzunmüddətli və ciddi müalicə tələb edən xəstəliklərə yoluxmuş xaricə gedən şəxslərin müalicəsi şığorta şirkətinin hesabına aparıla bilməz.
"Turistlərin sığortası hansısa xəstəliyi deyil, yalnız ilk təcili tibbi yardımı nəzərdə tutur", - Hüseynov deyib.
Onun sözlərinə görə, bu praktika yalnız Başak İnamda deyil, dünyanın bir çox şirkətlərində tətbiq olunur.
Hüseynovun sözlərinə görə, Başak İnam müştərilərə həm ölkə daxilində, həm də xaricdə müalicə xərclərini ödəmək üçün ayrıca tibbi sığorta VİP paketi təklif edir.
"Şirkətlə bu cür tibbi sığorta müqaviləsi bağlamış müştərilər həm Azərbaycanda, həm də ölkə hüdudlarından kənarda istənilən xəstəliyin müalicəsinə arxayın ola bilərlər", - Hüseynov deyib.
Az Sigorta şirkətinin idarə heyətinin sədri Xəyal Məmmədxanlı deyib ki, başqa yoluxucu xəstəliklər kimi "donuz qripi" də "fors major" siyahısına daxildir və şirkət "Travel Insurance" çərçivəsində belə müştərilərin müalicəsini öz üzərinə götürmür.
Cümə axşamı Səhiyyə Nazirliyi Azərbaycanda "donuz qripi"nə iki yoluxma faktının aşkarlanması barədə bəyanat verib. İyulun 27-də Parisdən qayıdan xanım iki gün sonra tibb məntəqəsinə müraciət edib. Analizlərin nəticəsində virusun mövcudluğu müəyyənləşib.
Azərbaycanda 28 sığorta və bir təkrarsığorta şirkəti fəaliyyət göstərir. Azərbaycan Maliyyə Nazirliyinin operativ məlumatına əsasən, ilin birinci yarısının yekunlarına görə, şirkətlər 24,65 milyon manatlıq ödəmələrlə 79,89 milyon manat sığorta pulu toplayıblar. Bütün şirkətlərin tibbi sığorta üzrə pulları 6,17 milyon manat, ödəmələrlə 12,805 milyon manat təşkil edib.
Məqalə müəllifi ilə əlaqə ünvanı: [email protected]
