Azərbaycan, Bakı, 03 avqust / Trend , müxbir E. İsmayılov /
Azərbaycan, Gürcüstan və Türkiyəni birləşdirən Bakı-Tbilisi-Qars dəmir yolunun inşası çərçivəsində iş normal rejimdə aparılır. Azərbaycan Nəqliyyat Nazirliyindəki mənbə dəmir yolunun tikintisi qrafikinin tam maliyyələşməmə səbəbindən pozulması barədə Rusiya KİV-nin informasiyasını şərh edərkən deyib.
"Hər şey qaydasındadır, bu layihə çərçivəsində işlər normal rejimdə aparılır, heç bir problem yoxdur", - mənbə deyib.
Dəmir yolunun Gürcüstan ərazisindəki hissəsinin inşası üçün Azərbaycandan veriləcək güzəştli kredit çərçivəsində Azərbaycan Dövlət Neft Fondu (ARDNF) 27,1 milyon manat ayırıb, bir müddət əvvəl ARDNF-nin rəhbəri Şahmar Mövsümov deyib.
"Neft fondundan bu layihəyə ayrılan vəsaitin həcmi hazırda 27,1 milyon manatdır. Tikinti üzrə iş indi davam edir. Lakin Gürcüstanda baş verən hadisələrlə əlaqədar gecikmə var. Tezliklə iş daha yüksək templə aparılacaq", - bir müddət öncə Mövsümov deyib.
Bakı-Tbilisi-Qars dəmir yolunun inşası layihəsinin maliyyələşməsi üçün ARDNF ilin birinci yarısında 1,1 milyon manat ayırıb.
Azərbaycan Bakı-Tbilisi-Qars marşrutunun Gürcüstan hissəsinin bərpasına Neft Fondundan 200 milyon dollar ayırmağı planlaşdırır. "Marabda-Qars dəmir yolu" MMC-nin cari təminatı üçün əmək haqları və dəftərxana xərclərini ödəmək məqsədilə nəzərdə tutulmuş 280 min dollardan çox vəsait verilib.
20,7 milyon manatlıq ilk tranş 2007-ci ildə ayrılıb. 2008-ci ildə ARDNF Gürcüstan ərazisində Bakı-Tbilisi-Qars dəmir yolunun inşası layihəsinin maliyyələşməsinə 5,3 milyon manat yönəldib.
Bakı-Tbilisi-Qars layihəsi çərçivəsində dəmir yolu magistralının yeni 105 km-lik qolunun tikintisi planlaşdırılır. Bunun 76 km-i Turkiyə, 29 km-i isə Gürcüstan ərazisindən keçəcək. Bundan əlavə, nəqletmə gücünü ildə 15 mln. ton yükə çatdırmaq üçün Gürcüstanda 183 km-lik Axalkalaki - Marabda - Tbilisi dəmir yolunun 183 km-lik hissəsi yenidən qurulacaq. Axalkalakidə Gürcüstanda mövcud olan dəmir yolu xətlərinin Avropa standartlarına uyğunlaşdırılması üzrə məntəqələrin tikilməsi də planlaşdırılır.
Avqustun 3-nə olan rəsmi məzənnə 0,8042 AZN/USD təşkil edir.
Məqalə müəllifi ilə əlaqə ünvanı: [email protected]